Qazaqstanǵa Reseıden shoshqa men onyń ónimderin kirgizýge tyıym salyndy
PETROPAVL. QazAqparat – Reseıde shoshqanyń afrıkalyq obasy beleń alýyna baılanysty elimizde saqtyq sharalary kúsheıtildi, dep habarlaıdy QazAqparat tilshisi.
Soltústik Qazaqstan oblysy veterınarııa basqarmasynyń málimetinshe, Reseıde búgingi tańda shoshqanyń afrıkalyq obasy shyǵyp, mal qyrylyp jatyr. Osyǵan oraı Aýylsharýashylyǵy mınıstrliginiń veterınarlyq baqylaý jáne qadaǵalaý komıteti shoshqa men jabaıy qabandardy, olardyń etin, ónimderi men jemazyǵyna deıin shekaradan kirgizýge tyıym saldy.
«Avtokólikterdi ótkizý beketindegi veterınarlyq-sanıtarlyq bekette el aýmaǵyna ótetin barlyq taýarlar men avtokólikter tekseriledi. Omby oblysynda shoshqanyń afrıkalyq obasy paıda bolǵan eldi mekende 24 jeltoqsanǵa deıin karantın engizildi. Jaǵdaıdy qadaǵalap otyrmyz. Shekteý sharalary epızootııalyq jaǵdaı túzelgenshe deıin alynbaıdy», - deıdi SQO veterınarııa basqarmasynyń basshysy Berik Áljanov.
Qaýipti aýrýǵa baılanysty SQO-da arnaıy baǵdarlama qabyldandy. Obanyń aldyn alý úshin shoshqa ósiretin sharýashylyqtar men jekemenshik mal ıeleri arasynda túsindirý jumystary júrgizilip jatyr.
Mamandardyń aıtýynsha, shoshqa obasy adamǵa juqpaıdy. Biraq, aýyrǵan mal emdelmeıdi, tek joıý kerek. Oǵan qarsy vaktsına áli tabylmaǵan. Aýrý belgileri 2-9 kún ishinde paıda bolyp, aýyrǵan mal birneshe saǵattan keıin óledi eken. Obany juqtyrǵan shoshqanyń qyzýy kóterilip, jem jeýden qalady, terisi kógerip, ókpesi qabynady.
Búginde SQO-da 235 myń shoshqa bar.
