Qazaqstanǵa Reseıden ákelingen 125 tekshe metr aǵashtan qaýipti zııankes tabyldy
ASTANA. KAZINFORM - Aýyl sharýashylyǵy mınıstrliginiń Agroónerkásiptik keshendegi memlekettik ınspektsııa komıtetiniń aýmaqtyq ınspektsııalary karantındik fıtosanıtarııalyq baqylaý barysynda Reseı Federatsııasynan zalaldanǵan orman ónimderin ákelý faktilerin anyqtady.
Ósimdikter karantıni jónindegi memlekettik ınspektorlar jalpy kólemi 125 tekshe metr bolatyn qaraǵaıdan jasalǵan qylqan japyraqty aǵash materıaldaryn el aýmaǵyna kirgizýge jol bermedi.
Karantındik fıtosanıtarııalyq baqylaý júrgizý kezinde aǵash materıaldarynan karantındik mańyzy bar qaýipti nysan – Monochamus tuqymyna jatatyn qaraǵaı súrekqońyzynyń dernásilderi anyqtaldy.
Zań buzýshylyq Abaı oblysynyń Semeı qalasynda árqaısysynyń kólemi 40 tekshe metr bolatyn aǵash materıaldary legin qaıta tekserý barysynda anyqtaldy.
Taǵy bir jaǵdaı Astana qalasynda kólemi 45 tekshe metr aǵash materıaldary legin tekserý kezinde tirkeldi.
Anyqtalǵan barlyq fakti boıynsha zerthanalyq saraptama júrgizilip, nátıjesinde qaraǵaı súrekqońyzy dernásilderiniń bar ekeni rastaldy.
Karantınge jatqyzylǵan ónim ıelerine qatysty Qazaqstan Respýblıkasynyń Ákimshilik quqyq buzýshylyq týraly kodeksiniń 400-babynyń 2-bóligi boıynsha ákimshilik quqyq buzýshylyq týraly hattamalar toltyryldy. Materıaldar mamandandyrylǵan ákimshilik sottardyń qaraýyna joldandy.
Aýyl sharýashylyǵy mınıstrligi syrtqy ekonomıkalyq qyzmetke qatysýshylarǵa karantınge jatqyzylǵan ónimderdi el aýmaǵyna ákelý kezinde karantındik zańnama talaptaryn qatań saqtaý qajettigin eske salady.
Osyǵan deıin Qyrǵyzstannan ákelingen jemisterden qaýipti zııankester anyqtalǵan bolatyn.
