Qazaqstanǵa Reseıden 90 myń tonna dızeldik otyn jetkiziledi

ASTANA. QazAqparat -«QazMunaıGazÓnimderi» Reseıden Qazaqstanǵa 90 myń tonna dızel otynyn ımporttaıdy, dep habarlaıdy «QazAqparat» HAA tilshisi.

Bul týraly búgin Ortalyq kommýnıkatsııalar ortalyǵynda tilshiler suraǵyna jaýap bergen «QazMunaıGazÓnimderi» JShS bas dırektory Qýandyq Qulmyrzın málim etti.

«Úkimet pen «QazMunaıGaz» basshylyǵynyń tapsyrmasyna sáıkes, «QazMunaıGazÓnimderi» JShS Qazaqstanǵa Reseıden 90 myń tonna dızeldik otyndy alyp keletin boldy. Tasymal «QazMunaıGazÓnimderi» JShS jelisi boıynsha júzege asyrylady. «QazMunaıGazÓnimderi» JShS jelileri (janar-jaǵarmaı quıý beketteri - avt.) Qazaqstandaǵy jelilerdiń ortaq balansynyń 15-16 paıyzyn ǵana alatynyn esepke ala otyryp, biz ımporttyq dızeldik otynnyń bir bóligin «Gelıos», «Sınoıl» sekildi jeliler arqyly alyp kelemiz. Demek, biz olarǵa kómektesemiz. Dızeldik otynmen biz barlyq iri jelilerdi qamtamasyz etemiz. Shaǵyn jelilerdi qamtýǵa tyrysamyz», - deıdi «QazMunaıGazÓnimderi» JShS bas dırektory Qýandyq Qulmyrzın.

Onyń aıtýynsha, dızeldik otynnyń 9 myń tonnasy jolda kele jatyr. Qalǵany jaqyn arada jetkiziletin bolady. Qazaqstannyń soltústik, batys jáne ortalyq óńirlerinde aýa temperatýrasynyń tómendeýine baılanysty janarmaı aldymen atalǵan aımaqtarǵa tasymaldanady. Al Qazaqstannyń ońtústik óńirleri «PetroKazakhstan Oil Products» Shymkent MÓZ shyǵarǵan dızel otynymen qamtamasyz etiledi.

«QazMunaıGaz» JMSQ jelisi maýsymaralyq dızel otynynyń baǵasyn (óndirgen memleketine qaramastan) lıtrin 155-160 teńge deńgeıinde ustap turady.