Qazaqstanǵa Reseıden 1300 tonna dızeldik otyn jetkiziledi

ASTANA. QazAqparat - Pavlodar munaı-hımııalyq óńdeý zaýytyndaǵy óndiristik sýtegi qurylǵysynyń jospardan tys jóndelýine baılanysty Qazaqstanǵa Reseıden 1300 tonna dızeldik otyn ákeletin boldy. Bul týraly Energetıka mınıstri Qanat Bozymbaevtyń Qazaqstandaǵy munaı óńdeý zaýyttarynyń basshylarymen kezdesýi barysynda belgili boldy, dep habarlaıdy «QazAqparat» HAA tilshisi.

Pavlodar munaı-hımııalyq óńdeý zaýytynyń bas dırektory Danbaı Shýhrat kezdesýden keıin tilshilerdiń saýalyna jaýap bere otyryp, zaýytty jańǵyrtý jumysy shegine jetkenin, búgingi tańda táýligine 2,5 myń tonna benzın óndirilip jatqanyn málim etti. Onyń aıtýynsha, jalpy Pavlodardaǵy zaýyt aldaǵy ýaqytta táýligine 5 myń tonna benzın óndirýdi josparlap otyr.

«Biraq óndiristik sýtegi qurylǵysyn ornatýǵa baılanysty bizde shaǵyn jóndeý jumystary bastalyp ketkendikten, aýqymdy másele týyndap otyr. Metallmen jumys atqaratyndar bul máseleni óte jaqsy biledi. Jalpy aıtarym, barlyq zaýyttar metaldan jasalady. Adam densaýlyǵynyń syr beretini sekildi, metaldyń da jumysynda keıde aqaýlar anyqtalyp jatady. Bul olqylyqtyń ornyn aldaǵy ýaqytta eskeretin bolamyz», - deıdi Danbaı Shýhrat.

Pavlodar munaı-hımııalyq óńdeý zaýytynyń bas dırektory óz sózinde, jóndeý máselesi sheshimin tapqannan keıin qurylǵy iske qosylǵannan, dızeldik otyndy óndirý jumysy qaıta qalpyna keltiriletinin atap ótti.

«Ázirge dızeldik otyndy ımporttaý júrip jatyr. Qazirgi ýaqytta Reseı Federatsııasy tarapymen kesilimder jasaldy. Bizdiń defıtsıt «Qazmunaıgaz» esebinen sheshiletin bolady. Naryqqa kerekti 1300 tonna dızeldi otyn kirgiziledi. Meniń oıymsha, biz bir aıda bul máseleni retke keltirip, jeltoqsan aıynda qajetti ónimdi óndiretin bolamyz», - deıdi Danbaı Shýhrat.