Qazaqstanǵa palma maıyn kirgizbeý týraly aıtyldy

NUR-SULTAN. QazAqparat - Májilis depýtaty Narıne Mıkaelıan Qazaqstan aýmaǵyna sapasyz palma maıyn kirgizýge tyıym salýdy surady. Osy oraıda ol bul máselege baılanysty QR Úkimet basshysy Asqar Mamınniń atyna depýtattyq saýal joldady, dep habarlaıdy QazAqparat tilshisi.

«Dúnıejúzilik densaýlyq saqtaý uıymy baıandamasyna súıensek, palma maıy semizdikke, asqazan-ishek joly jáne júrek-qantamyrlary júıesi aýrýlaryna alyp keledi. EAEO komıssııasy birazdan beri azyq-túlik ónimderin tańbalaýda palma maıynyń bar ekendigi týraly málimetterdiń mindetti kórsetilýin engizbeı keledi», - dedi depýtat.

Onyń paıymynsha, óndirýshiler tamaq ónimderiniń shynaıy quramyn jasyrý úshin palma maıyn ádeıi kórsetpeıdi. Biryńǵaı ekonomıkalyq keńistik aıasynda Qazaqstandaǵy saýda jelilerine quramynda palma maıy bar sút, irimshik ónimderi men kondıterlik taýarlar kelip jatyr.

«Osy oraıda shekarada azyq-túlik ónimderi sapasyna qaraıtyn jyljymaly baqylaý beketterin kúsheıtýdi, sondaı-aq Qazaqstanǵa sapasyz palma maıy men onyń negizindegi ózge de ónimderdi kirgizbeýdi qamtamasyz etý máselesin qarastyrýdy suraımyz», - dedi Narıne Mıkaelıan.