Qazaqstanǵa Ózbekstannan 5 mln týrıst kelgen
ASTANA. KAZINFORM — Búgin elordada Qazaqstan men Ózbekstan arasyndaǵy týrıstik yntymaqtastyqty damytýǵa arnalǵan forým ótti. Jıynǵa eki elden 300-ge jýyq adam qatysty.
Byltyr Qazaqstanǵa Ózbekstannan 5 mln astam saıahattaı kelipti. Al bizde Tashkent pen Buharany kórýge 2,6 mln qazaqstandyq barǵan. Búginde eki el arasynda aptasyna 50-den astam turaqty áýe reısi qatynaıdy. Sońǵy bir jylda qatarǵa 6 jańa tikeleı baǵyt qosylǵan.
— Tsıfrlar ózdiginen-aq bárin kórsetip otyr. Búginde Qazaqstan Ózbekstanǵa týrıster eń kóp keletin elder arasynda Qyrǵyzstannan keıingi ekinshi orynda tur. Eki el úshin de bul sala ulttyq ekonomıkanyń negizgi qozǵaýshy kúshteriniń biri. Sondyqtan týrızmdi damytý men qoldaý eki memlekettiń Úkimetteri úshin basym baǵyttardyń biri sanalady. Sonymen qatar eki halyqtyń baı mádenı-tarıhı murasyn da atap ótý kerek, — dedi Ózbekstan Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Bahtıer Ibragımov.
Forýmda tarıhı jáne kıeli oryndardy qamtıtyn zııarat týrızmin damytý máselesi de talqylandy. Týroperatorlar men bıznes ókilderi jańa týrıstik ónimder men birlesken jobalardy tanystyrdy. Medıtsınalyq týrızmge de erekshe nazar aýdaryldy.
— Ózbekstanda medıtsınalyq týrızm jaqsy damyǵan. Máselen, eń úzdik tórt shıpajaıdy alsaq, kelýshilerdiń 98 paıyzy — qazaqstandyqtar. Búgingi forým eki elge medıtsınalyq týrızmdi birlesip damytýǵa jáne osy baǵytta tájirıbe almasýǵa jaqsy múmkindik beredi, — dedi Healthy Holiday sanatorııler jelisi bas dırektorynyń orynbasary Raısa Ibragımova.
Jalpy, forým eki eldiń týrıstik bıznes ókilderi arasynda jańa baılanystar ornatýǵa múmkindik beredi. Taraptar týrıstik baǵyttardy kóbeıtip, jańa ónimder ázirleýge jáne medıtsınalyq týrızmdi damytýdaǵy yntymaqtastyqty kúsheıtýge nıetti.
Aıta keteıik, buǵan deıin Qazaqstan Ózbekstannyń eń iri úsh saýda seriktesiniń qataryna da kirgeni belgili boldy.
