Qazaqstanǵa Ortalyq Azııadaǵy sheteldik ınvestıtsııanyń 70 paıyzyna jýyǵy tıesili
ASTANA. KAZINFORM — Bul týraly Memleket basshysy «Ortalyq Azııa – Koreıa Respýblıkasy» bıznes-sammıtinde aıtty.
Prezıdenttiń aıtýynsha, Ortalyq Azııanyń jıyntyq ishki jalpy óniminiń shamamen 60 paıyzy jáne aımaqqa shetelden tikeleı tartylatyn ınvestıtsııanyń 70 paıyzǵa jýyǵy Qazaqstanǵa tıesili.
– Ortalyq Azııanyń ekonomıkalyq damýy men órkendeýine elimizdiń qosqan eleýli úlesin osy kórsetkishten ańǵarýǵa bolady. Sapar aıasynda eki el arasynda somasy 19 mıllıard dollarǵa jýyqtaıtyn 80-deı kommertsııalyq kelisimge qol qoıyldy. Bul – qurǵaq málimdeme nemese qazirgi tilmen aıtqanda, qaǵaz júzinde qalatyn mámile emes, iske asatyn naqty josparlar. Qalaı bolǵanda da Úkimet bıznes-jobalardyń ýaqtyly oryndalýyn jiti qadaǵalaıdy. Qazaqstan Úkimeti birlesken jobalardy óz deńgeıinde júzege asyrý úshin koreı kásipkerlerine jan-jaqty qoldaý kórsetedi. Ol úshin Qazaqstan men Koreıanyń saýda-ekonomıkalyq jáne ınvestıtsııalyq yntymaqtastyǵynyń 2027-2030 jyldarǵa arnalǵan keshendi baǵdarlamasy ázirlenedi. Biz ınvestıtsııalyq ahýaldy dáıekti túrde jaqsartyp, sheteldik ınvestorlarǵa barynsha qolaıly jaǵdaı jasap kelemiz. Elimizde bıznes bastaýǵa nıetti ınvestorlarǵa artyqshylyqtar usynatyn Altyn Visa baǵdarlamasynyń engizilýi – mańyzdy qadamnyń biri. Koreı kásipkerleri, jalpy koreı bıznesi osy artyqshylyqtardy belsendi túrde paıdalanady dep oılaımyn, – dedi Qasym-Jomart Toqaev.
Memleket basshysy birlesken jobalardy júzege asyrý úshin áleýeti zor baǵyttarǵa toqtalyp, ónerkásip salasyndaǵy yntymaqtastyqty nyǵaıtýdy negizgi basymdyq retinde atady.
– Qazirgi ýaqytta Qazaqstan men Koreıa quny 4 mıllıard dollardan asatyn 51 jobany júzege asyryp jatyr. Byltyr elimizde 170 myńnan astam avtokólik shyǵarylyp, óndiris kólemi shamamen 18 paıyzǵa ósti. Oǵan Hyundai men Kia zaýyttary úlken úles qosty. Munyń bári – lokalızatsııany arttyrýǵa, qosylǵan quny joǵary tehnologııalyq ónimder shyǵarýǵa baǵyttalǵan jumystyń berik negizi. Lokalızatsııa úderisin muqııat baqylap otyrmyn. Árıne, bul bir kúnniń sharýasy emes. Degenmen alǵa qaraı qadam basa bergenimiz jón, – dedi Prezıdent.
Aıta ketelik Qasym-Jomart Toqaev «Ortalyq Azııa – Koreıa Respýblıkasy» birinshi bıznes-sammıtine qatysýshylarǵa iltıpat bildirip, Qazaqstan Koreıa Respýblıkasynyń Ortalyq Azııa elderimen ekonomıkalyq baılanysty jan-jaqty damytý nıetin joǵary baǵalaıtynyn atap ótken edi.
