Qazaqstanǵa oralyp jatqan qazaq jastary kóp - ombylyq tanymal sánger

ASTANA. QazAqparat - «VKontakte» áleýmettik jelisindegi «Biz - reseıliktermiz» tobynda ombylyq tanymal sánger Ermek Hapızov tarıhı Otandaryna oralyp jatqan qazaqtardyń qarasy kóptigin jazdy. Bul týraly Qazaqstannyń Reseıdegi Elshiliginiń resmı saıtynda habarlandy.

Hapızovtyń aıtýynsha, olar Qazaqstanda otbasyn quryp, jumysqa ornalasýda. Solaısha, Sibirdegi jerlesterine úlgi bolyp otyr.

«Astanaǵa kelgen saıyn, Qazaqstan elordasynyń damý qarqynyna tańdanamyn. Kúnnen-kúnge gúldenip kele jatqan astanamen birge bútin el de damý ústinde. Reseı qazaqtary bul jarqyn ózgeristerdi kórýde jáne jyl saıyn bir ǵana Omski oblysynan Qazaqstanǵa júzdegen jastar oralýda. Munda olar bilim alýda, jumysqa ornalasyp, otbasyn quryp jatyr. Ondaı mysaldardy júzdep keltirýge bolady. Olardyń barlyǵy omskilik qazaq jastaryn tarıhı Otandaryna oralýǵa jigerlendirýde. Qazaqstannyń árbir jetistigine biz shyn júrekten qýanamyz», - dep jazady Hapızov.

Hapızov bul sózderin Astanada ótken EKSPO-2017 kórmesi kezinde de aıtqan bolatyn. Sánger halyqaralyq sharaǵa belsendi qatysyp, tipti reseılik pavılonnyń delegatsııasy úshin kıim úlgisin tikken bolatyn.