Qazaqstanǵa Ońtústik Koreıadan keletin azyq-túlikke shekteý qoıyldy
Atalmysh monıtorıngti Densaýlyq saqtaý mınıstrligi Qoǵamdyq densaýlyq saqtaý komıteti aı saıyn júrgizedi.
«Genetıkalyq modıfıkatsııalanǵan obektilerge qatysty Nur-Sultan qalasyndaǵy dúkenderde monıtorıng júrgizildi. Nátıjesinde Ońtústik Koreıadan keletin azyq-túliktiń tórt túrinde - soıa men júgeri baǵytyndaǵy ónimderde GMO mólsheriniń kóp ekeni belgili bolyp otyr. Atap aıtqanda, soıa men júgeride GMO mólsheri 2 paıyzdan 100 paıyzǵa deıingi aralyqta bolǵan. Negizgi shek - 0,9 paıyz bolatyn. Ol ónimderdiń qataryna «Klıar» aýnatylǵan qospasy men jyldam daıyndalatyn lapshanyń úsh túri endi», - dedi QR DSM Qoǵamdyq densaýlyq saqtaý komıtetiniń tóraǵasy - Bas memlekettik sanıtar Jandarbek Bekshın OKQ-da ótken baspasóz máslıhatynda.
Onyń aıtýynsha, azyq-túliktiń atalǵan túrlerin tasymaldaý men satýǵa qatysty ýaqytsha sanıtarlyq sharalar qabyldanǵan.
«Qazirge deıin ónimderdiń atalǵan túrlerin saýda sórelerinen tárkileý jumystary júrgizildi. Sonymen birge, Qazaqstanǵa atalmysh ónimderdi tasymaldaýshy ımporterlermen kezdesý ótkiziledi. Ońtústik Koreıa elshiligine nota joldandy», - deıdi Bekshın.
Aıta keteıik, buǵan deıin Jandarbek Bekshın taýar qaýipsizdigin qamtamasyz etý boıynsha 2019 jyldyń 1 toqsanynda júrgizilgen jumys qorytyndysyn jarııalaǵan bolatyn.