Qazaqstanǵa Norvegııa, Chılı, Islandııadan balyq jetkiziledi

ASTANA. QazAqparat – Qarjy mınıstrligi Memlekettik kirister komıteti balyqtyń taýar aınalymy boıynsha qyzyqty faktilermen bólisti, dep habarlaıdy QazAqparat tilshisi.

2021-2022 jyldary quny 196,3 mln AQSh dollary bolatyn 50,2 myń tonna balyq ımporttalǵan (2021 jyly – 24 myń tonna, 2022 jyly – 26,2 myń tonna).

Onyń ishinde Norvegııadan 125 mln dollarǵa 31,2 myń tonna, Chılıden – 16,9 mln dollarǵa 2 myń tonna, Islandııadan – 2,3 mln dollarǵa 1,2 myń tonna, Vetnamnan – 3,2 mln dollarǵa 700 tonna, Qytaıdan – 800 myń dollarǵa 200 tonna jáne basqa da Eýropa elderinen balyq ákelindi.

Eksportqa kelsek, 94,3 mln AQSh dollaryna 19,7 myń tonna balyq jiberilgen (2021 jyly – 31,4 mln dollarǵa 8,3 myń tonna, 2022 jyly – 62,9 mln dollarǵa 11,2 myń tonna).

Onyń ishinde Germanııaǵa – 25,1 mln dollarǵa 4,4 myń tonna, Nıderlandyǵa – 17 mln dollarǵa 2,7 myń tonna, Lıtvaǵa – 14,7 mln dollarǵa 2,2 myń tonna, Ýkraınaǵa – 1,6 mln dollarǵa 1,4 myń tonna, Ózbekstanǵa – 800 myń dollarǵa 1,2 myń tonna, Qytaıǵa – 300 myń dollarǵa 300 tonna jáne basqa Eýropa elderine balyq eksporttalǵan.

«2021, 2022 jáne 2023 jyldyń 4 aıyndaǵy kedendik statıstıkaǵa súıene otyryp, basqa elderden ımporttalatyn suranysy joǵary balyq túrleri anyqtaldy. Negizgi jetkizýshiler – Norvegııa men Chılı. Ásirese, muzdatylǵan Atlantıka jáne Dýnaı aqserkesi, skýmbrııa jáne maıshabaqtar suranysqa ıe bolyp otyr. Sondaı-aq, muzdatylǵan balyq basqa Eýropa elderinen de ákelinedi. Úsh jyldyń alǵashqy 4 aıynda Germanııa, Lıtva, Nıderlandy jáne basqa da Eýropa elderine 111,1 mln dollarǵa 17 myń tonnaǵa tuşy sýda mekendeıtin balyqtyń jon eti muzdatylǵan kúıde eksporttaldy», - deıdi Memlekettik kirister komıtetiniń baspasóz qyzmeti.

Kedendik statıstıkaǵa sáıkes, 2023 jyldyń 4 aıynda 38,8 mln dollarǵa 10,7 myń tonna balyq syrttan ákelindi jáne 26,7 mln dollarǵa 4,6 myń tonna balyq eksporttaldy.

Bıyl negizinen Norvegııadan (5,7 myń tonna), Islandııadan (600 tonna), Vetnamnan (100 tonna), sondaı-aq basqa Eýropa elderinen balyq jetkizildi. Germanııaǵa (1,1 myń tonna), Nıderlandyǵa (800 tonna), Lıtvaǵa (500 tonna), Ýkraınaǵa (100 tonna), Qytaıǵa (300 tonna), Ózbekstanǵa (200 tonna) jáne basqa Eýropa elderine eksporttalǵan.