Qazaqstanǵa myqty ÚEU qajet – Májilis depýtaty

NUR-SULTAN. QazAqparat – Parlament Májilisiniń depýtaty Aıdos Sarym eldegi azamattyq qoǵamnyń róli týraly pikir bildirdi, dep habarlaıdy QazAqparat tilshisi.

Prezıdent Qasym-Jomart Toqaevtyń Joldaýynyń negizgi baǵyttaryna arnalǵan saraptamalyq talqylaýda Aıdos Sarym Qazaqstanda azamattyq qoǵam qalaı jumys isteýi kerek degen suraqqa jaýap berdi.

«Qazir azamattyq qoǵamǵa myqty taldaý qajet. Ne degenmen atqarýshy bılik – jaqsy uıymdastyrylǵan kúsh. Ol óziniń múddelerin jaqsy túsinedi, ǵylymı-zertteý ınstıtýttary bar. Bizge ár túrli salalarda óz saraptamasyn jasaıtyn, óz taldaýy bar, salystyrýǵa bolatyn sandary bar myqty úkimettik emes uıymdar (ÚEU) qajet», - dedi Aıdos Sarym «QazAqparat» halyqaralyq aqparat agenttiginiń baspasóz ortalyǵynda ótken saraptamalyq talqylaýda.

Sondaı-aq, spıker qazirgi Májilistiń jumysyna toqtaldy.

«Úkimet kóptegen zań jobalaryn depýtattar bastaǵanyn qalaıdy. Reprezentatsııa deńgeıinde aıtar bolsaq, qazirgi Májiliste azamattardyń túrli áleýmettik sanattary qamtylǵan. Múgedekter de bar, muǵalimder, dárigerler bar, qandaı da bir mamandandyrý men saraptama bar, munyń bári zańdardy jaqsy jazýǵa múmkindik beredi. Biz bıýdjetti úsh jylǵa josparlaımyz. Keıbir aspektiler boıynsha Joldaý 3-4 jylǵa, al keıbir máseleler – tipti 10-15 jylǵa sozylýy múmkin», - dedi A. Sarym.

Aıta keteıik, «QazAqparat HAA» AQ baspasóz ortalyǵynda QR Prezıdenti Joldaýynyń negizgi baǵyttary týraly saraptamalyq talqylaý ótti. Jıynǵa QR Parlamenti Májilisiniń depýtaty Aıdos Sarym, Eýropalyq quqyq jáne adam quqyqtary saraptamalyq ınstıtýtynyń dırektory Marat Báshimov, QR Parlamenti Májilisiniń Halyqaralyq ister, qorǵanys jáne qaýipsizdik komıtetiniń múshesi ıÝlııa Kýchınskaıa qatysty.

https://kaz.inform.kz/news/barlygy-kogam-men-el-maselelerin-sheshuge-bagyttalgan-aydos-sarym-prezident-zholdauy-turaly_a3832037