Qazaqstanǵa munaı saqtaý úshin rezervýar salýdyń qajeti shamaly - S. Myńbaev
Búgin Májilistegi Úkimet saǵatynda depýtattardyń saýalyna jaýap bergen Munaı jáne gaz mınıstri Saýat Myńbaev osyndaı pikir bildirdi.
Mınıstrdiń aıtýynsha, Qazaqstan jyl saıyn shamamen 80 mln. tonna munaı óndirse, onyń 14 mln. tonnasy ishki naryqqa jóneltiledi. Ulttyq qaýipsizdik, munaı jáne munaı ónimderiniń aınalymy týraly zańǵa sáıkes, Munaı jáne gaz mınıstrligi kez-kelgen ýaqytta ishki naryqqa qanshalyqty munaı qajet bolsa, sonshalyqty jiberýge quqyly, qalǵany eksportqa ketedi.
«Bizdiń jaǵdaıymyzda qymbat rezervýarlar salyp, onda munaı saqtaýdyń qajeti bola qoıar ma eken? Óıtkeni, bizde qazirdiń ózinde óndiriletin munaıdy kez-kelgen ýaqytta zaýyttarǵa jónelte alatyn shamamyz bar. Sondyqtan da, Qazaqstanǵa munaı rezervýary keregi joq dep sanaımyz. Degenmen, ken oryndaryn bolashaqta ıgerýge rezervteýdiń mańyzy zor», - dedi S. Myńbaev.
Onyń paıymynsha, memleket úshin geologııalyq barlaý sharalaryna ınvestıtsııa salyp, ken oryndary tabylǵan jaǵdaıda sol oryndardy bolashaqta paıdalaný úshin rezervke qoıý mańyzdy.