Qazaqstanǵa munaı óndirý kvotasyn saqtamady degen aıyp taǵyldy

ASTANA. KAZINFORM – Energetıka mınıstrligi Qazaqstannyń OPEK+ kelisimi boıynsha óz mindettemelerine berik ekenin jáne koalıtsııanyń basqa qatysýshylarymen óz áreketterin úılestiretinin rastady. 

Munaı óndirý kvotalaryn oryndamaǵany úshin halyqaralyq zertteýshiler tarapynan aıtylǵan synǵa jaýap retinde Qazaqstan ótemaqy tóleýdiń egjeı-tegjeıli josparyn ázirledi. 

– OPEK+ kelisimi boıynsha mınıstrlerdiń 37-shi otyrysynyń sheshiminen keıin Qazaqstan egjeı-tegjeıli ótemaqy josparyn daıyndady. Soǵan sáıkes birinshi jartyjyldyqta 2025 jyldyń qyrkúıegine deıin asyp ketken kólemderdi kezeń-kezeńimen óteıdi. Qazaqstan óz mindettemelerin oryndaýǵa jáne josparly ótemaqy jospary boıynsha artyq óndirilgen ónimniń ornyn toltyrýǵa bar kúsh-jigerin salady. 2024 jyldyń maýsym aıyndaǵy barlyq qaıtalama óndiris kózderinen tolyq derekter alynǵannan keıin OPEK Hatshylyǵyna jańartylǵan ótemaqy jospary usynylady, - delingen habarlamada.

Aıta keteıik, buǵan deıin amerıkalyq Bloomberg basylymy Qazaqstandy halyqaralyq uıym belgilegen kvotalardy elemedi dep aıyptaǵan maqala jarııalaǵan bolatyn. 

Sondaı-aq Qazaqstan buryn qabyldanǵan erikti mindettemelerin 2025 jyldyń sońyna deıin uzartty.