Qazaqstanǵa múldem kelmegen oralmandardy tirkeý nátıjesinde bıýdjetke 80 mln. teńge shyǵyn keldi - QR Bas prokýratýrasy
ASTANA. 27 qańtar. QazAqparat /Arman Asqarov/ - Elimizdiń kóshi-qon mamandary oralmandardyń respýblıka aýmaǵyna kelýdiń 360 jalǵan faktisin tirkep,
80 mln. teńgeden astam qarjyny jymqyrǵan. Bul týraly búgin búgin Astanadaǵy baspasóz máslıhatynda QR Bas prokýratýrasynyń resmı ókili Jandos Ómirálıev málim etti.
Onyń habarlaýynsha, tek Qostanaı oblysynda ǵana osyndaı zań buzýshylyqtardyń jalpy somasy 40 mln. teńgeni qurady. «Onda oralman azamattarǵa arnalǵan birjolǵy járdemaqy Mońǵolııa jáne Ózbekstannan kelgen 300 adamǵa jazylǵan. Biraq olardyń birde-bireýi de memlekettik shekaradan ótpegen», - deıdi J.Ómirálıev.
Al Aqtóbe oblysynda oralmandardy aldap-arbaý arqyly olarǵa tıesili 1 mln. teńgeni ıelengen top ustaldy. Qazirgi kezde tek osy is boıynsha ǵana qylmystyq is qozǵalyp otyr. QR Bas prokýratýrasynyń resmı ókili atap kórsetkendeı, osy jáne basqa da zań buzý faktilerine kóshi-qon salasynyń qyzmetkerleri jol bergen. «Bul jerde basshylyqtyń da jibergen qatelikteri joq emes», - deıdi J.Ómirálıev.
Aıta keteıik, QR Bas prokýratýrasy «Nurly kósh» memlekettik baǵdarlamasy boıynsha Úkimet basshysyna birqatar usynystardy engizýdi kózdep otyr. Sondaı-aq osy máseleler búgin QR Bas prokýratýrasynyń keńeıtilgen alqa májilisinde talqylanatyn bolady.
