Qazaqstanǵa Muhammed paıǵambardyń ómirin beıneleıtin kóshpeli mýzeı keledi
Sonymen qatar elimizne saıahattap keletin saýdııalyq týrsıterdiń qatary artady. Bul týraly Mádenıet jáne sport mınıstri Dáýren Abaev pen elimizge jumys saparymen kelgen Saýd Arabııasy Koroldiginiń Qajylyq jáne ýmra mınıstri Taýfık ben Faýzan ál-Rabıanyń kezdesýinde málim bolǵan. Taraptar eki el arasyndaǵy týrızmdi damytý máselelerin talqylady.
Mınıstrlerdiń kezdesýi Ulttyq mýzeıde uıymdastyryldy. Meımandar ulttyq jádigerlerimizben, el tarıhymen tanysyp, Qazaqstan tabıǵatyn nasıhattap, ınvestıtsııalyq múmkindikter týraly baıandaıtyn vıdeolardy tamashalady. Osy rette delegatsııa músheleri Qazaqstanda zamanaýı kontent arqyly Muhammed (s.ǵ.s.) paıǵambardyń ómirinen syr shertetin kórme uıymdastyrý boıynsha ótinish bildirdi. Ony Saýd Arabııasyndaǵy Abdýlazız patshasynyń atyndaǵy «Álem mádenıeti ortalyǵy» (Ithra) Almaty jáne Astana qalalaryndaǵy mýzeılermen birigip ótkizetin bolady.
Sondaı-aq Saýd Arabııasy men Qazaqstan arasynda tikeleı qatynaıtyn áýe reısteriniń jumysy, týrıstik operatorlardyń tyǵyz baılanysy, mádenı-tanymdyq nysandardyń ózara yntymaqtastyǵy jaıly sóz qozǵaldy.
«Biz bıyl saýdııalyqtarǵa elimizdi nasıhattaý maqsatynda eki márte roýd-shoý uıymdastyrdyq. Qazirgi kezde Saýd Arabııasy Koroldiginiń azamattary Qazaqstanǵa vızasyz kelip, bir aı boıy demala alady. Ótken jylǵy kórsetkishtermen salystyrǵanda elimizge saıahattap kelgen saýdııalyqtardyń sany eki ese ósken. Qazaqstannyń tabıǵaty, jyl mezgilderi týrsıter úshin qolaıly. Sondyqtan týrızmdi damytý maqsatynda birigip jobalar ázirleýge daıynbyz», – dedi QR Mádenıet jáne sport mınıstri Dáýren Abaev.
Taýfık ben Faýzan ál-Rabıanyń sózinshe, olar saýdııalyqtardyń Qazaqstanǵa týrıstik saparlaryn zerttep jatyr. Saýdııalyq týrsıterdiń Qazaqstanǵa kóptep kelýi kútilýde.
«Sonyń bir dáleli retinde aıta keteıin, keshe men Shymbulaqqa kóterilgen kezimde saýdııalyq týrısterdi baıqadym. Negizi, saýdııalyqtar saıahatqa eń kóp qarjy jumsaıtyn týrıster qatarynda. Qazaqstanda tarıhı oryndardyń da kóp ekenin baıqadyq. Endi eki el azamattarynyń ózara saıahattaýyn jeńildetetin jaǵdaı jasaıyq, men sizderden úlken qolldaý kútemin», – dedi Saýd Arabııasy Koroldiginiń Qajylyq jáne ýmra mınıstri.
