Qazaqstanǵa merzimi ótip ketken vaktsına ákelingeni týraly feık tarady
Qazaqstanda qoldanylatyn «Spýtnık-V» vaktsınasy Qaraǵandy farmatsevtıkalyq kesheninde shyǵarylady. Uıym ókilderi preparattyń patsıentterge merzimi ótip jetkiziletini týraly qaýesetti joqqa shyǵardy.
– Qaraǵandy farmatsevtıkalyq kesheninde shyǵarylǵan «Spýtnık V» preparatynyń árbir partııasy (I jáne II komponenti) vaktsına óndirýshide (sapasyn rastaý úshin, reseılik sarapshylardyń qatysýymen, iriktelgen úlgiler Gamaleıa at. Ortalyqqa jiberiledi) sáıkestikke qatań tekseristen ótedi. Vaktsınanyń sapasy men qaýipsizdigin kópsatyly deńgeıli baqylaýdan keıin «Spýtnık-V» QR naryǵyna jiberiledi. Preparat keminde -35S temperatýrada saqtalatyn qoımadan «sýyq tizbekti» qatań saqtaı otyryp, «SK-Farmatsııa»-nyń vaktsına tasymaldaý boıynsha arnaıy kóligine tıeledi. Biryńǵaı dıstrıbıýtor habtaryna jáne odan ári QR óńirlerine jetkizýdi «SK-Farmatsııa» júzege asyrady», – dep habarlady «Qaraǵandy farmatsevtıkalyq kesheni» JShS baspasóz qyzmetinen.
«SK-Farmatsııa» kompanııasynda túsindirgendeı, preparatty óńirlerge jóneltý ekpe óndirýshiden kelip túsken soń birden júzege asyrylady.
– Vaktsınalardy saqtaý merzimi shyǵarylǵan kúnnen bastap 6 aıdy quraıdy. Vaktsınalardy jetkizý óndiristik tsıklge baılanysty. Óndirýshiden alynǵan vaktsına dereý óńirlerge jóneltiledi. Vaktsınalardy óńirlerge úlestirý qalǵan mólsherin, sondaı-aq medıtsınalyq mekemeler, vaktsınatsııa pýnktteri deńgeıinde saqtaý múmkindikterin eskere otyryp júzege asyrylady, – dep habarlady «SK-Farmatsııa».
Osylaısha, preparat vaktsınatsııalaý pýnktterine qoldanýǵa jaramdy kúıde túsedi. Sonymen qatar, vaktsına alǵan árbir qazaqstandyq ampýlany kórsetýdi surap, preparattyń merzimi ótip ketpegenine kóz jetkizýge quqyly.
«Barshańyzdy tek resmı aqparatqa ǵana senýge shaqyramyz» dep eskertedi Stopfake.kz.
