Qazaqstanǵa Majarstan nelikten tartymdy bolyp otyr
ASTANA. QazAqparat - Sońǵy eki jylda Qazaqstannan Majarstanǵa týrıstik aǵyn aıtarlyqtaı artty, dep habarlaıdy QazAqparat.
Qazaqstannyń Majarstandaǵy Tótenshe jáne ókiletti elshisi Nurbah Rústemovtyń aıtýynsha, 2017 jyldyń maýsym aıynda Býdapesht pen Astana arasynda tikeleı áýe baılanysynyń ashylýy ekijaqty qatynastardaǵy mańyzdy oqıǵa boldy. Resmı tasymaldaýshy retinde majarlyq «Wizz Air» kompanııasy bekitildi.
«Majarstan statıstıka jáne kóshi-qon agenttiginiń málimetinshe, tikeleı reıs ashylǵanǵa deıin jylyna Qazaqstannan 240 adam saparlaǵan eken. Al tikeleı áýe baılanysy bastalǵannan beri Qazaqstannan Majarstanǵa týrıstik aǵyn arta tústi. Osy arqyly, 40 myńnan astam el azamaty Majarstanǵa saparlady», - dedi elshi.
Sonymen qatar atalǵan elden Qazaqstanǵa saparlaǵan týrıster sany da artqan.
«Astana týrıster tartýdyń naqty ortalyǵyna aınalýda. Astanadan Ortalyq Azııa elderine, Qytaıǵa, Malaızııaǵa, Úndistanǵa, Ońtústik Koreıaǵa áýe baılanystary qamtamasyz etilgen. Qazaqstandyq týrıster úshin Býdapesht qalasy da úlken hab bolyp otyr. Býdapeshtten ushaqtar Eýropanyń 72 núktesine baǵyttalady», - dedi ol.
