Qazaqstanǵa Máskeý men Novosibirden jańa áýe reısteri qatynaıdy
ASTANA. QazAqparat - 2018 jyly Taraz, Kókshetaý jáne Pavlodar qalalaryna Máskeý men Novosibirden tikeleı áýe reısteri ashylady, dep habarlaıdy QazAqparat Azamattyq avıatsııa komıtetine siteme jasap.
«2018 jyldyń 29 sáýirinen bastap reseılik tasymaldaýshy - «Sıbır» áýe kompanııasy ushý jıiligi aptasyna eki ret bolatyn Máskeý - Taraz jáne bıylǵy 1 maýsymnan bastap aptasyna eki ret oryndalatyn Máskeý - Kókshetaý baǵyttaryndaǵy jańa turaqty áýe reısterin ashýdy josparlap otyr. Reıster Aerobýs 319/320 tıpindegi áýe kemesimen júrgiziledi», - dep jazdy komıtet áleýmettik jelidegi resmı paraqshasynda.
Sonymen birge, atalǵan áýe kompanııasy 2018 jyldyń 30 mamyrynan bastap, Novosibir - Pavlodar baǵytyndaǵy turaqty reıster ashýdy josparlap otyr. Bul reıster aptasyna eki ret Aerobýs 319/320 tıpindegi áýe kemesimen júrgiziledi.
