Qazaqstanǵa qytaılyq týrısterdi kóptep tartýymyz qajet - vıtse-mınıstr Batalov

ASTANA. QazAqparat - Búginde shetelge shyǵatyn týrısterdiń sany jaǵynan Qytaı Halyq Respýblıkasy kósh bastap tur. Aspanasty eliniń 150 mln-ǵa jýyq azamaty álemdi aralaǵanda shamamen 280 mlrd dollar jumsaıdy, dep xabarlaıdy QazAqparat tilshisi.

«Sol sebepti bizge qytaılyq týrısterdi kóptep tartý qajet. Olar úshin arnaıy týrıstik baǵyttardy ázirlegen durys dep oılaımyn» , - dedi QR Mádenıet jáne sport vıtse-mınıstri Asqar Batalov búgin týrıstik salany damytýǵa arnalǵan jıynda. Onyń aıtýynsha, ótken jyly Qazaqstanǵa 117 myń qytaılyq týrıst kelip ketken.  Bul elimizge kelgen týrısterdiń 10 paıyzy. Qalǵan 90 paıyzy - Reseı, Qyrǵyzstan, Ózbekstan sııaqty jaqyn kórshiler. «Bizdiń negizgi maqsatymyz - 2025 jylǵa deıin Qazaqstanǵa keletin týrısterdiń jalpy sanyn 7 mln-ǵa jetkizý. Osy oraıda týrıster úshin vızaǵa qujat tapsyrýdyń elektrondy júıesin daıarlaý jumysy bastaldy. Budan bólek, biz Qazaqstan arqyly tranzıtpen ótetin Iran men Úndistan azamattary úshin 72 saǵatqa deıingi vızasyz rejımdi engizý jobasyn daıyndap qoıdyq», - dep atap kórsetti Batalov.

Aıta keteıik, búgingi tańda Qytaı azamattary úshin 72 saǵatqa deıingi vızasyz rejım engizilgen. Atalǵan bastama EKSPO kórmesi aıasynda pılottyq joba retinde qolǵa alynyp otyr. Oǵan sáıkes, Astana men Almaty áýejaılary arqyly basqa elderge ushyp bara jatqan qytaılyq týrıster Qazaqstanda úsh kún boıy vızasyz júre alady.