Qazaqstanǵa qytaılyq CoronaVac vaktsınasynyń alǵashqy partııasy jetkizildi
Preperatty qytaılyq Sinovac Biotech Ltd bıofarmatsevtıka kompanııasy óndirgen. Ol arnaıy bortpen jetkizildi.
Bul - aldaǵy kúnderi QR azamattaryna koronavırýs ınfektsııasyna qarsy vaktsınatsııa úshin qoldanylatyn tórtinshi preparat bolmaq.
«Biz eki eldiń ýaǵdalastyǵy arqasynda baǵa jetpes júk aldyq. Bul vaktsına Qazaqstandaǵy jaǵdaıdy turaqtandyrýǵa jáne odan ári jaqsartýǵa qyzmet etedi. Preparat erteń Almatynyń egý pýnktilerinde qoljetimdi bolady jáne ujymdyq ımmýnıtetti qalyptastyrýǵa kómektesedi. Búginde Almatyda 300 myńnan astam adamǵa ekpe salyndy. Biz qala turǵyndaryn óziniń jáne jaqyndarynyń densaýlyǵyna baıypty qaraýǵa shaqyramyz, vaktsına - búginde koronavırýs ınfektsııasynyń aldyn alýdyń eń tıimdi quraly», - dedi qalanyń bas sanıtar dárigeri Jandarbek Bekshın.
CoronaVac vaktsınasyn Qazaqstan aýmaǵynda qoldanýǵa QR Densaýlyq saqtaý mınıstrligi maquldady jáne elde qoldanylyp júrgen QazVac, «Spýtnık V» jáne Hayat Vax vaktsınalarynyń tizbesin tolyqtyrady.
Sonymen qatar QR SІM Almaty qalasyndaǵy ókildiginiń basshysy Asqar Shoqybaev QHR-dan CoronaVac vaktsınasyn jetkizý týraly ýaǵdalastyqty iske asyrý COVID-19 pandemııasyna birlesip qarsy turýda qytaılyq áriptestermen bastalǵan yntymaqtastyqty tabysty jalǵastyrýdyń mysaly retinde qarastyrylatynyn aıtty.
Habarlanǵandaı, kelip túsken vaktsına partııasy qoldanystaǵy qazaqstandyq jáne reseılik vaktsınalarmen qatar elimizdiń barlyq egý pýnktilerinde qoljetimdi bolady.
