Qazaqstanǵa Qytaıdan kelgen 315 adam karantınde jatyr

NUR-SULTAN. QazAqparat - Densaýlyq saqtaý mınıstrliginiń resmı ókili 2020 jyldyń 1 aqpany – 1 naýryzy aralyǵynda barlyq elderden Qazaqstan Respýblıkasyna 1 606 851 adam kelgenin málim etti, dep habarlaıdy QazAqparat tilshisi.

«Sonymen qatar EAEO aýmaǵynan 938 309 adam keldi. 6 aqpan men 1 naýryz aralyǵynda QHR-dan 32 456 adam keldi. Sanıtarlyq dárigerdiń qaýlysyna saı, sanattar boıynsha aıta keteıin. 1 A sanatyndaǵy, ıaǵnı Qytaıdan kelgen 20 aqpan men 4 naýryz aralyǵynda 315 adam (64-i Qazaqstan azamaty, 251-sheteldikter, onyń ishinde 248-i Qytaı azamaty) qazirgi tańda karantınde jatyr. Iran Islam Respýblıkasynan osy aralyqta 24 adam kelgen. Onyń ishinde qazaqstandyqtar – 9, qalǵan 15-i ırandyqtar», - dedi Qazmedıada ótken baspasóz máslıhatynda Dıas Ahmetshárip.

Qazirgi ýaqytta 63 adam laboratorııalyq tekserýden ótip, olardan vırýs anyqtalmaǵan.

«1 B sanatyna Qytaıdyń Gonk-Kong arnaıy ákimshilik aýdany, sol sııaqty Makao, Taıvan, Japonııa jáne Italııa kiredi. Osy 1 B sanaty boıynsha úı karantıninde 512 adam jatyr. Onyń ishinde 393-i Qazaqstan azamaty bolsa, 119-y — sheteldikter, atap aıtqanda 50-i Koreıa, 65-i Italııa, 4-eýi Japonııa azamaty. JRVI jáne tumaý belgilerimen 12 adam statsıonarǵa jatqyzyldy. Onyń 9-y Koreıadan kelgen. Italııadan 1 adam jáne Maltadan kelgen 1 adam bar», - dedi ol.

Sondaı-aq, Sıngapýr, Taıland jáne Ázerbaıjan elderinen 20 aqpan men 3 naýryz aralyǵynda 1965 adam monıtorıngige alynyp, alǵashqy 14 kúndik dárigerdiń baqylaýyna alynǵan.

«1 adam qashyqtyq baqylaýda. 15 adam laboratorııalyq tekserýden ótti. Onyń 14-i vırýs anyqtalǵan joq. Qalǵan bir analız áli tekserilýde. 1 aqpannan bastap ekinshi sanat boıynsha JRVI jáne tumaý belgilerimen aýrýhanalarǵa 23 adam jatqyzyldy», - dedi ol.