Qazaqstanǵa Qytaıdan gýmanıtarlyq kómektiń birinshi partııasy jetkizildi

NUR-SULTAN. QazAqparat - QR Prezıdenti Qasym-Jomart Toqaevtyń QHR Tóraǵasy Sı Tszınpınmen jaqynda ótken telefon arqyly sóılesýiniń qorytyndysy boıynsha qytaı tarapynyń Qazaqstanǵa gýmanıtarlyq kómek berýi týraly ýaǵdalastyqqa qol jetkizildi, dep habarlaıdy QR SІM baspasóz qyzmeti.

«Búgin tańerteń Almaty qalasynyń áýejaıyna birinshi gýmanıtarlyq kómektiń partııasy keldi. Onyń ishinde teplovızor, test jıyntyǵy, medıtsınalyq bahıla, qolǵap, kózildirikter jáne medıtsınalyq kıim kiredi. Jaqyn arada Qytaıdan medıtsınalyq qorǵanys quraldarynyń taǵy da kelýi kútilýde» delingen habarlamada.

Málimetke saı, Almaty áýejaıynda júkti «Farmatsııa» SQ, Almaty qalasyndaǵy QR SІM ókildigi, QHR Bas konsýldyǵy ókilderi kútip aldy.

Aıta keteıik, buǵan deıin Qazaqstan da Qytaıǵa gýmanıtarlyq kómek jasaǵan bolatyn. Keıin Qytaı Halyq Respýblıkasy Syrtqy ister mınıstrligi koronavırýs indetimen kúres úshin jetkizilgen Qazaqstannyń gýmanıtarlyq kómegine alǵys bildirdi.