Qazaqstanǵa qysqy Azııa oıyndary kezinde 10 myń týrıst keledi
ALMATY. Tamyzdyń 23-i. QazAqparat /Erbol Azanbek/ - Búgin Almatyda «7-shi qysqy Azııa oıyndaryn uıymdastyrý komıtetiniń atqarýshy dırektsııasy» AQ-nyń prezıdenti Anatóli Qulnazarov pen «Qazaqstan týrıstik qaýymdastyǵy» ZTB-niń tóraıymy Rashıda Shaıkenova yntymaqtastyq pen ózara túsinistik týraly memorandýmǵa qol qoıdy,
dep habarlaıdy QazAqparat.
Anatóli Qulnazarovtyń aıtýynsha, memorandým elimizge keletin týrıster legin qalyptastyrý úshin qysqy Azııa oıyndaryn nasıhattaýǵa jáne bul baǵytta birlesken is-sharalardy júzege asyrý maqsatynda jasalynyp otyr. Memorandýmǵa sáıkes Qazaqstan týrıstik qaýymdastyǵy Azııa oıyndary kezinde Qazaqstanǵa kelip-ketetin týroperatorlar men týrısterge keńes berý, halyqaralyq týrıstik kórmelerde oıyndardy nasıhattaý, turǵyndar arasynda týrıstik mádenıetti qalyptastyrý boıynsha jumystar júrgizedi. Oıyndardy uıymdastyrý dırektsııasy óz kezeginde qaýymdastyqqa Qazaqstannyń týrıstik salasyn damytýǵa kómek kórsetedi. «Oıyndar kezinde elimizge 10 myń sheteldik qonaq keledi dep kútýdemiz. Bularǵa oıyndar týraly durys nasıhat, oıyndar kezinde olarǵa túrli múmkindikter jasaý úshin týrıstik qaýymdastyqpen arnaıy memorandým jasap otyrmyz. Bundaı sporttyq iri sharalar ekonomıkaǵa oń áserin tıgizedi. Bul jerde týrızm salasy óte mańyzdy ról atqarady. Osydan kelip oıyndardyń týrıstik salany damytýǵa serpin beretinin baıqaýǵa bolady», deıdi A.Qulnazarov.
Óz kezeginde «Qazaqstan týrıstik qaýymdastyǵy» ZTB-niń tóraıymy Rashıda Shaıkenova alǵa qoıylǵan maqsattardy júzege asyrý úshin Qazaqstannyń 9 jetekshi týrıstik operatoryn tartýdy usyndy. «Bul iri sporttyq shara elimizdiń týrızm salasynyń damýyna túrtki bolady. Máselen, qazir ár týrısten 2 myń dollarǵa jýyq qarjy qalady. Osyny eseptep kórsek, oıyndardyń eki qalanyń bıýdjetine qansha paıda ákeletinin kórýge bolady. Sondyqtan týrısterdi tartýǵa bul is-sharanyń oń áseri tıedi dep oılaımyn», dedi R.Shaıkenova.
