Qazaqstanǵa kvota boıynsha kelgen 38 myń adamnyń 63 paıyzy bilikti maman - B.Nurymbetov
ASTANA. QazAqparat - Qazaqstanda kvota boıynsha 38 myń sheteldik jumys isteýde. Bul týraly búgin Ortalyq kommýnıkatsııalar qyzmetinde QR Densaýlyq saqtaý jáne áleýmettik damý vıtse-mınıstri Birjan Nurymbetov málim etti.
«Jalpy otandyq kóshi-qon saıasaty eki qaǵıdattarǵa súıenedi: birinshisi - ishki eńbek naryǵyn qorǵaý, ekinshisi - shetelden biliktiligi joǵary mamandardy tartý. Bizdiń elde qazirgi ýaqytta sheteldik eńbek kúshin tartý tártibi kvota bólýge jáne ruqsat berýge negizdeledi. Kvotany Úkimet belgileıdi, olar eldegi sheteldik eńbek adamdarynyń san mólsherin bekitedi. Keıin ol kvotalar jumys berýshilerdiń ótinishterine baılanysty aımaqtarǵa úlestiriledi», - dedi ol. Onyń habarlaýynsha, 2015 jyly Qazaqstanda kvota ekonomıkalyq belsendi halyqtyń 0,7 paıyz úlesin quraýy tıis dep bekitildi jáne 63 myń adamdy qurap otyr. «Bizde qazir 38 346 resmı túrde sheteldik sarapshy jumys atqaryp jatyr. Olardyń 63 paıyzy joǵary bilikti mamandar, top-menedjerler, orta deńgeıdegi basqarýshylar, 37 paıyz - bilikti mamandar men jumyskerler. Qazaqstanǵa 144 elden shetel mamandary eńbek etýde, olardyń 60 paıyzy qurylysta jumys jasaıdy», - dep atap ótti B.Nurymbetov.
