Qazaqstanǵa quıylǵan sheteldik ınvestıtsııalar kólemi pandemııaǵa deıingi deńgeıge oraldy
NUR-SULTAN. QazAqparat - Ulttyq banktiń málimeti boıynsha, Qazaqstan sheteldik kapıtal aǵynynyń tómendeý úrdisin kúrt ózgertip qana qoımaı, elimizge quıylyp jatqan ınvestıtsııalar kórsetkishin 2017-2019 jyldardyń deńgeıine deıin jetkizip otyr, dep habarlaıdy QazAqparat QR Syrtqy ister mınıstrligine silteme jasap.
Osylaısha, 2021 jyldyń qorytyndysy boıynsha, elimizge tartylǵan tikeleı sheteldik ınvestıtsııalardyń jalpy aǵyny 23,7 mlrd. AQSh dollaryna jetip, kórsetkish 2020 jylmen salystyrǵanda 37,7%-ǵa ósken (17,2 mlrd. AQSh dollary).
Qazaqstan ekonomıkasyna eń kóp ınvestıtsııa salǵan memleketterdiń úzdik bestigi ózgerissiz qaldy. Nıderland, AQSh, Shveıtsarııa, Reseı jáne Qytaı 25%-dan 92%-ǵa deıin ósimimen kósh basynda. Atalǵan elderdiń úlesi elge tartylǵan barlyq ınvestıtsııalardyń jalpy kóleminiń 68,3%-yn quraıdy. Úzdik ondyqtaǵy qalǵan bes el: Belgııa, Ulybrıtanııa, Koreıa Respýblıkasy, Túrkııa, Frantsııa.
Aıta ketý kerek, aýyl, orman jáne balyq sharýashylyǵyna ınvestıtsııalyq salymdar 2,8 esege, kásibı, ǵylymı-tehnıkalyq qyzmet salasyna 2,6 esege, aqparat pen baılanys salasyna 80,1%-ǵa, al elektrmen jabdyqtaý salasyna 68,3%-ǵa ulǵaıyp otyr. Óńdeý ónerkásibi de edáýir ósim kórsetti. Bul salaǵa 2020 jylmen salystyrǵanda ınvestıtsııa 2 mlrd. AQSh dollaryna artyq quıylyp, 65,4%-ǵa artty.
Sheteldik kapıtal aǵynyn ulǵaıtýǵa ınvestıtsııalyq jobalar pýly men «QR elshilikteri - ortalyq memlekettik organdar - aımaqtyq ákimshilikter» úsh deńgeıli júıesiniń sátti júzege asyrylýy nátıjesinde qol jetkizilip otyr. Sondaı-aq, syrtqy ister mınıstrliginiń boljamy boıynsha, 2021 jyly 19 mlrd. AQSh dollarynan astam sheteldik ınvestıtsııa tartylady.
Eske salsaq, Standard&Poor's halyqaralyq agenttigi Qazaqstannyń táýelsiz kredıt reıtıngin «BBB-/A-3» deńgeıinde rastap, boljam «turaqty» dep jarııalaǵan bolatyn.
