Qazaqstanǵa kórshilik qatynastaryn únemi pysyqtap otyrýǵa týra keledi - Pıter Frankopan
ASTANA. KAZINFORM – Oksford ýnıversıtetiniń professory, «Jerdiń aıtylmaǵan tarıhy» bestselleriniń avtory Pıter Frankopan Astanada ótip jatqan «Connested-2024» halyqaralyq konferentsııasynyń jalpy otyrysynan keıin BAQ ókilderine suhbat berdi.
Pıter Frankopan BAQ ókilderiniń jasandy zeıin, tsıfrlandyrý tendentsııalarynyń adamzat tarıhyna áseri týraly suraqtaryna jaýap bere otyryp, Qazaqstannyń álem geosasatyndaǵy orny týraly paıymyn aıtty.
«Qazaqstan álemdegi eń iri memleketterdiń biri. Bul el zamannyń tynysh kezinde aıryqsha qyzyqty, al qıyn shaqtarda óte kúrdeli óńirge aınalyp shyǵa keletin aımaqta tur. Soltústikterińizde Reseı, shyǵys jaqtaryńyzdy Qytaı bar. Bir búıirińizde Ortalyq Azııa jatyr. Iran men Aýǵanstan da alys jatqan joq. Sondyqtan Qazaqstanǵa kórshilik qatynastardy udaıy pysyqtap otyrýǵa týra keledi», - dedi Oksford professory.
Tarıhshy Batys qoǵamynyń Qazaqstandy Ortalyq Azııanyń bir bólshegi retinde qaraýy keı jaǵdaıda tıimsiz ekenin aıtady.
«Biz, batystaǵylar, Qazaqstandy únemi Ortalyq Azııa elderimen birge qaraımyz. Mundaı tásil árdaıym tıimdi deýge kelmeıdi. Qazaqstannyń aýmaǵy úlken, halqynyń sany ósip keledi, jastar kóp. 1991 jyly Astananyń shaǵyn qala bolǵanyn elestetýdiń ózi qıyn. Qazir ol Qazaqstannyń ortalyǵyna aınalyp otyr. Soǵan qarap bul eldegi ózgerister qarqyny orasan bolǵanyn túsinýge bolady. Eldiń endigi tynys-tirshiligi kóbine sizderge, jas býynǵa baılanysty bolady. Sizderdiń ne isteıtinderińizge, qandaı ózgeristerdi qalaıtyndaryńyzǵa baılanysty», - dedi Pıter Frankopan.
Buǵan deıin Astanada álemniń 60 elinen shaqyrylǵan sarapshylar «Connested-2024» halyqaralyq konferentsııasyna qatysyp jatqanyn jazǵanbyz.
