Qazaqstanǵa qonys aýdarýshylarǵa turǵyn úı men jumys tabýǵa qoldaý kórsetiledi
ASTANA. KAZINFORM — Qonys aýdarýshylar men qandastardy qoldaý aıasynda 471 otbasyǵa 4,5 mln teńgelik turǵyn úı sertıfıkaty berildi.
QR Eńbek jáne halyqty áleýmettik qorǵaý mınıstrligi Kazinform agenttiginiń resmı saýalyna joldaǵan jaýabynda kóshý men beıimdelýge baǵyttalǵan qoldaý sharalary birneshe baǵytty qamtıtynyn habarlady.
— Qonys aýdarýshylar men qandastarǵa kóshýge birjolǵy tólemder, turǵyn úıdi jaldaý jáne kommýnaldyq qyzmetter shyǵyndaryn óteý, jumys berýshilerge sýbsıdııa berý, qysqa merzimdi kásiptik oqytý, sondaı-aq ekonomıkalyq mobıldilik sertıfıkattaryn usyný kózdelgen, — delingen mınıstrliktiń resmı jaýabynda.
Sonymen qatar qonys aýdarǵan azamattardy jumyspen qamtý máselesi de oń sheshilip jatyr:
🔹 Eńbekke jaramdy jastaǵy azamattar sany — 2 982 adam
🔹 Ózin-ózi jumyspen qamtyǵandar — 1 756 adam
🔹 Kásipkerlikpen aınalysyp júrgender — 45 adam
🔹 Memlekettik grant alǵandar — 31 adam
Mınıstrlik málimetinshe, memlekettik qoldaý aıasynda:
▪️ kóshý kezinde otbasynyń árbir múshesine 70 aılyq eseptik kórsetkish (AEK) mólsherinde birjolǵy tólem beriledi;
▪️ turǵyn úıdi jaldaý jáne kommýnaldyq qyzmetterge baılanysty shyǵyndardy óteý úshin bir otbasyna aı saıyn 15-ten 30 AEK-ke deıin, 12 aı boıy tólem qarastyrylǵan;
▪️ qonys aýdarýǵa járdem kórsetken jumys berýshilerge 400 AEK kóleminde sýbsıdııa beriledi;
▪️ qonys aýdarýshylar qysqa merzimdi kásiptik oqýǵa jiberiledi;
▪️ jumysqa ornalasýǵa nemese kásip bastaýǵa qoldaý kórsetiledi, onyń ishinde ekonomıkalyq mobıldilik sertıfıkattary beriledi.
Aıta keteıik, 2025 jyly Qazaqstanǵa 6 843 adam kóship kelgen.