Qazaqstanǵa kimder turaqty qonystana alady: jańa mamandyqtar tizimi jarııalandy
ASTANA. KAZINFORM — Qazaqstanda shetel azamattarynyń elde turaqty turýǵa ruqsat alýyna negiz bolatyn suranysqa ıe mamandyqtar tizimin qalyptastyrý qaǵıdalary jańartyldy, dep habarlaıdy Kazinform tilshisi.
Qazaqstan Respýblıkasy Eńbek jáne halyqty áleýmettik qorǵaý mınıstriniń 2026 jylǵy 26 mamyrdaǵy buıryǵymen sheteldikterge elde turaqty turýǵa ruqsat alýǵa quqyq beretin suranysqa ıe mamandyqtar tizimine jáne ony qalyptastyrý qaǵıdalaryna ózgerister engizildi.
Qujatqa sáıkes, 2026 jylǵy 12 shildeden bastap «Elektrondyq eńbek bırjasy» memlekettik tsıfrlyq portalynyń jańartylǵan uǵymy engiziledi. Bul – Qazaqstan Respýblıkasynyń Áleýmettik kodeksine sáıkes jumys izdeýdi, kadrlardy irikteýdi jáne jumyspen qamtý salasyndaǵy qyzmetterdi elektrondyq ári proaktıvti formatta usynýdy qamtamasyz etetin biryńǵaı tsıfrlyq jumyspen qamtý platformasy.
Suranysqa ıe mamandyqtar tizimi budan bylaı «Sheteldik jumys kúshi» avtomattandyrylǵan tsıfrlyq júıesiniń derekterin, kadrlarǵa degen orta merzimdi qajettilik boljamyn jáne «Elektrondyq eńbek bırjasy» portalyndaǵy bos jumys oryndaryn taldaý negizinde qalyptastyrylady.
Sonymen qatar jańa tsıfrlyq platforma atalǵan tizimdi ázirleý kezinde 2026 jylǵy 12 shildeden bastap qoldanyla bastaıdy.
Mınıstrliktiń málimetinshe, buıryqtyń ózi 2026 jylǵy 12 maýsymnan bastap kúshine enedi. Alaıda jekelegen normalar keıinirek qoldanysqa engiziledi.
Vedomstvonyń habarlaýynsha, suranysqa ıe mamandyqtar tizimine densaýlyq saqtaý, ınjenerııa, tsıfrlyq tehnologııalar, bilim berý jáne kreatıvti ındýstrııa salalaryndaǵy mamandar qosylǵan.
Atap aıtqanda, densaýlyq saqtaý salasy boıynsha neırohırýrg, gematolog, onkolog, neonatolog, endokrınolog dárigerleri, sondaı-aq anestezıolog-reanımatologtar men akýsher-gınekologtar bar.
Injenerlik-tehnıkalyq baǵytta avıatsııa, ǵarysh tehnologııalary, farmatsevtıka ónerkásibi, lazerlik jabdyqtar jáne jańa óndiristik tehnologııalar salasyndaǵy mamandar qamtylǵan.
Tsıfrlyq tehnologııalar men ınnovatsııalar salasyna baǵdarlamalyq qamtamasyz etýdi ázirleýshiler, jasandy ıntellekt pen úlken derekter jónindegi mamandar, aqparattyq júıeler sáýletshileri, kıberqaýipsizdik ınjenerleri, bultty esepteý tehnologııalary boıynsha mamandar jáne basqa da ІT qyzmetkerleri engizilgen.
Sondaı-aq tizimge pedagogıka ǵylymdarynyń ókilderi men kreatıvti ındýstrııa mamandary – grafıkalyq dızaınerler, sýretshi-ıllıýstratorlar, beınemontajerler jáne dybys rejısserleri endi.
Buǵan deıin elimizde turaqty turyp jatqan qansha sheteldik bar ekenin jazǵan bolatynbyz.
