Qazaqstanǵa Qytaıdan oıynshyq ımporty úsh esege jýyq azaıdy
ASTANA. KAZINFORM – 2026 jylǵy qańtar–shilde qorytyndysy boıynsha Qazaqstanǵa 9,6 myń tonna balalar oıynshyǵy ımporttaldy. Bul – keminde 2015 jyldan bergi osy kezeńdegi eń tómen kórsetkish, dep habarlaıdy DATA HUB taldaý arnasy.
Ulttyq statıstıka bıýrosynyń málimetinshe, jyldyq mánde ımporttyń fızıkalyq kólemi 2,5 ese qysqarǵan.
Alaıda sarapshylar jetkizilim kóleminiń kúrt tómendeýin ázirge turaqty úrdis dep baǵalaýǵa bolmaıtynyn atap ótedi. Óıtkeni oıynshyq ımportynyń kólemi jyl saıyn aıtarlyqtaı ózgerip otyrady. Máselen, 2025 jylǵy qańtar–shildede ımport kerisinshe 71%-ǵa ósken.
Importtyń azaıýyna eń kóp áser etken el – oıynshyq jetkizýdiń negizgi bóligin qamtamasyz etetin Qytaı. Bir jyl ishinde Qytaıdan ákelingen oıynshyq kólemi 2,8 ese azaıyp, 7,7 myń tonnaǵa deıin túsken. Reseıden jetkizilim 39%-ǵa qysqaryp, 1,1 myń tonnany qurady.
Importtyń negizgi tómendeýi janýarlar men basqa da tirshilik ıeleri túrindegi jumsaq oıynshyqtar, ishine qozǵaltqysh ornatylǵan oıynshyqtar, jıyntyqtar men komplektiler, balalar minetin oıynshyqtar jáne konstrýktorlar boıynsha baıqaldy. Osy sanattar jıyntyǵynda ımporttyń jalpy qysqarýynyń 67%-yn qurady.
Aqshalaı mánde de ımport tómendedi. Jeti aıda onyń kólemi 45,9 mln dollardy qurasa, bir jyl buryn bul kórsetkish 81,4 mln dollar bolǵan. Osylaısha, tómendeý 44%-dy qurady. Bul – sońǵy 10 jyldaǵy eń tómen kórsetkish.
DATA HUB málimetinshe, Qazaqstanǵa ákelinetin balalar oıynshyqtary Keden odaǵynyń «Oıynshyqtardyń qaýipsizdigi týraly» tehnıkalyq reglamentiniń talaptaryna sáıkes kelýi tıis.
Sonymen qatar Densaýlyq saqtaý mınıstrliginiń baqylaý maqsatyndaǵy satyp alýlary tekserilgen oıynshyqtardyń bir bóligi belgilengen talaptarǵa sáıkes kelmeıtinin kórsetip otyr. Eń jıi kezdesetin buzýshylyqtar tańbalaýǵa qatysty bolsa, sırek jaǵdaıda zııandy zattardyń, sonyń ishinde formaldegıd, metıl spırti jáne atsetaldegıd mólsheriniń shamadan tys bolýy anyqtalady.
Qazirgi ýaqytta balalar oıynshyqtaryna sáıkestendirý quraldarymen mindetti tańbalaý talaby qoıylmaıdy. Tıisti talaptardy 2028 jylǵy 1 aqpannan bastap engizý josparlanyp otyr.
Eske sala ketsek, EO Temu-ǵa qaýipti taýarlar men balalar oıynshyqtaryn satqany úshin 200 mln eýro aıyppul salǵanyn jazdyq.
Sondaı-aq Qytaımen shekarada úsh kún boıy kólik pen júk ótkizilmeıti habarlandy.
