Qazaqstanǵa Qytaıdan qonys aýdarýshylar sany úsh esege kóbeıdi
ASTANA. KAZINFORM – 2026 jyldyń birinshi toqsanynda Qazaqstanǵa Qytaıdan keletin ımmıgranttar sany kúrt ósti, dep habarlaıdy Data Hub.
Qańtar–naýryz aılary aralyǵynda Qazaqstanǵa turaqty turýǵa Qytaıdyń 1 260 azamaty kelgen. Bul ótken jyldyń sáıkes kezeńimen salystyrǵanda úsh eseden astam joǵary kórsetkish.
QR Strategııalyq josparlaý jáne reformalar agenttigine qarasty Ulttyq statıstıka bıýrosynyń málimetinshe, birinshi toqsan qorytyndysy boıynsha Qytaıdan kóshi-qon aǵynynyń mundaı joǵary deńgeıi keminde sońǵy toǵyz jylda alǵash ret tirkelip otyr.
Sonymen qatar toqsandyq statıstıka dástúrli túrde qubylmaly bolyp keledi. ıAǵnı kúrt ósim kezeńderi keıin tómendeýmen almasyp otyrady.
Máselen, bir jyl buryn da kórsetkish erekshe ósim kórsetken. Sol kezde Qazaqstanǵa kelgender sany 98 adamnan 750 adamǵa deıin, ıaǵnı shamamen segiz esege artqan.
Degenmen sońǵy eki jyldaǵy turaqty joǵary kórsetkishter Qytaı azamattarynyń kóshi-qon belsendiliginiń ósý úrdisi qalyptasyp kele jatqanyn ańǵartady.
Birinshi toqsan qorytyndysy boıynsha Qytaı Qazaqstanǵa turaqty turýǵa kóship kelgen azamattar sany jóninen úshinshi orynǵa shyqty. Bul rette ekinshi orynda turǵan Reseıden aıyrmashylyq nebári bes adamdy qurady. Reseıden Qazaqstanǵa 1 265 ımmıgrant kelgen. Bul ótken jylmen salystyrǵanda 29 paıyzǵa kóp.
Kósh bastap turǵan el – Ózbekstan. Bul elden 2 275 adam qonys aýdarǵan. Alaıda munda kerisinshe tómendeý baıqaldy – kórsetkish byltyrǵy jylmen salystyrǵanda 13 paıyzǵa azaıǵan.
Qytaıdan kelgenderdiń basym bóligi – etnıkalyq qazaqtar. Olardyń úlesi 99,5 paıyzǵa jetedi. Qonystaný úshin eń tanymal óńirler qatarynda Astana, Almaty qalalary, sondaı-aq Almaty oblysy men Jetisý oblysy bar.
Immıgratsııalyq statıstıkaǵa turaqty turatyn elin resmı túrde aýystyrǵan shetel azamattary men azamattyǵy joq adamdar engiziledi.
Buǵan deıin Qazaqstanda Qytaıdan kelgen qandastar sany rekordtyq deńgeıge jetkeni habarlandy.
