Qazaqstanǵa Kıoto konventsııasynyń jańa qaǵıdattaryn der ýaqytynda engizý qajet - Halyqaralyq kedendik sarapshy
ASTANA. Mamyrdyń 12-si. QazAqparat /Jasulan Amanbaıuly/ - Búgin, sársenbide Astanada «Kedendik protsedýralardy jeńildetý jáne sáıkestendirýge baǵyttalǵan halyqaralyq konventsııalardyń talaptary arqyly saýda protsedýralaryn jeńildetý» atty semınar jumysy bastaldy,
dep habarlaıdy QazAqparat.
Kedendik baqylaý komıtetiniń jáne USAID uıymnyń uıymdastyrýymen ótip jatqan semınarǵa halyqaralyq sarapshy, Dúnıejúzilik kedendik uıymynyń jetekshi mamandarynyń biri Alan Holl, bas baıandamashy retinde shaqyryldy. Bul semınarda keden salasyndaǵy ulttyq zańnamanyń Kıoto konventsııasyna sáıkestiligi talqylanady.
«Qazaqstan úshin bul semınar Qazaqstan, Belarýs, Reseı Federatsııasy arasyndaǵy yqpaldastyq úderisterin belsendi túrde kúsheıtý qarsańynda óte ózekti bolmaq. Onyń ústine keden salasynda ulttyq zańnamalardy halyqaralyq konventsııalarmen ımplementatsııalaý mindettemeleri turǵandyǵy taǵy bar», deıdi Kedendik baqylaý komıteti tóraǵasynyń orynbasary Serjan Dúısebaev.
USAID uıymnyń kedendik reformalar boıynsha Aımaqtyq jobasynyń bas sarapshysy Sholpan Dosymhanovanyń aıtýynsha, Qazaqstannyń Kedendik Kodeksinde (2003) Kıoto konventsııasynyń ózgertilgen jarlyǵyndaǵy kedendik protsedýralardy retteýdiń basty qaǵıdattary engen. «Búgingi kúni Qazaqstan Kıoto konventsııasynda kórsetilgen taýarlardy jáne tulǵalardy rásimdeý boıynsha halyqaralyq tetikterdi tolyq qoldana alady», dep atap kórsetti ol.
Alan Holldyń atap kórsetýinshe, eldiń kedendik qyzmeti halyqaralyq deńgeıde básekege qabiletti bolýy úshin álemdik standarttardy eskere otyryp, ózderiniń jumystaryn tıimdi atqarýy tıis. «Dúnıejúzilik kedendik uıymynyń Kıoto konventsııasy kedendik protsedýralardy jeńildetý jáne halyqaralyq standattarmen sáıkestendirýge baǵyttalǵan basty qujattardyń biri. 2009 jyly konventsııanyń jańa ózgertýleri jasalǵannan keıin Qazaqstanǵa onyń jarlyqtaryn der ýaqytynda engizý qajet dep esepteımin», deıdi A. Holl.
3 kúnge sozylatyn semınar jumysyna Tájikstan jáne Qyrǵyz eliniń kedendik qyzmetteri de qatysýda.
