Qazaqstanǵa kıno týraly jeke zań qajet - Arystanbek Muhamedıuly
Mınıstr óz sózinde Qazaqstandaǵy kınematografııany 2050 jylǵa deıin damytý tujyrymdamasynyń qabyldanýy elimizdegi kınematografııanyń ahýalyn jaqsartýǵa baǵyttalǵan mańyzdy qadam bolatyndyǵyn basa aıtty. Osy arqyly memlekettik organdar, kınematografııa salasyndaǵy kınematograf uıymdar arasyndaǵy úılestirýshi tetik pen baǵdarlamalyq áreket qyzmetin atqarýy tıistigin atap ótti.
«Qazaqstannyń Táýelsizdik jyldary ishinde mundaı tujyrymdama alǵash ret ázirlenip otyr. Eger biz kıno týraly jeke zań qabyldaı alar bolsaq, óte qýanyshty jaıt bolady. Onda ónerdiń osynaý túrine qatysy bar barlyq qyzmet túrleri jazylar edi. Bul biz úshin óte mańyzdy», - dedi ol.
Sonymen qatar, Muhamedıuly búgingi kúni elimizde mádenıet týraly óte jaqsy zań qabyldanǵanyn, onda kitaphana isin, mýzeı isin, kınematografııany jáne basqa da salalardy damytý tetikteri jan-jaqty kórsetilgenin eske saldy.
«Degenmen, ómirdiń ózi kórsetip otyrǵandaı, bizge kıno týraly jeke zań asa qajet. Men bul máselege túsinistikpen qaraǵan bizdiń eksperttik qoǵamdastyqqa rızamyn. Sebebi, bul - qarapaıym másele emes. Búginde biz Frantsııa, Reseı jáne basqa da elderdiń kınematografııa týraly zańdaryn zerdeledik», - dedi Muhamedıuly.
