Qazaqstanǵa kelý úshin vıza talap etilmeıtin elder sanyn 100-ge deıin ulǵaıtý usynyldy

ASTANA. QazAqparat – Týrıster sanyn arttyrý úshin Qazaqstanǵa kirýde vıza talap etilmeıtin elder sanyn 100-ge deıin ulǵaıtý oryndy. Mundaı usynysty Ortalyq kommýnıkatsııalar qyzmetinde ótken brıfıngte Týrızm ındýstrııasy komıtetiniń tóraǵasy Dastan Ryspekov aıtty, dep habarlaıdy QazAqparat tilshisi.

«Bıyl 74 eldiń azamattary úshin Qazaqstanǵa vızasyz kelý rejımi qalpyna keltirildi. Úndistan, Qytaı jáne Iran azamattary úshin qosymsha vızasyz rejım engizildi. 28 elmen 113 baǵyt boıynsha halyqaralyq áýe qatynasy qalpyna keltirildi. Týrıster sanyn arttyrý maqsatynda Qazaqstanǵa kirý úshin vıza talap etilmeıtin elder sanyn 100-ge deıin ulǵaıtýdy oryndy dep esepteımiz», - dep atap ótti komıtet tóraǵasy.

Budan bólek, Dastan Ryspekov 5 halyqaralyq baǵyt boıynsha áýereısterdiń sany artatynyn málimdedi. Atap aıtqanda, Reseıge – 8, Mońǵolııaǵa – 2, Qytaıǵa -10, Úndistanǵa – 4 jáne Frantsııaǵa 2 qosymsha reıster ashylmaq.

Eske salaıyq, buǵan deıin sheteldik týrısterdiń elimizdiń qaı óńirlerine kóp saıahattaıtynyn jazyp edik. Týrızm ındýstrııasy komıtetiniń dereginshe, ózge memleketterden kelgender Almaty, Astana qalalary men Mańǵystaý oblysyna jıi saparlaıdy .