Qazaqstanǵa kelip aldanyp qalatyn sheteldik týrıster máselesi qalaı sheshiledi
ASTANA. KAZINFORM – Týrızm jáne sport mınıstri Erbol Myrzabosynov elimizge kelgen sheteldik týrısterdi taksı qyzmeti men valıýta aıyrbastaýda aldap ketý jaıttary baryn aıtty.
- Týrısterge arnalǵan QR kod júıesi engizilip jatyr. Keıde týrıster kelgen bette taksı, baılanys, valıýta aıyrbastaý sııaqty qyzmetterden aldanyp qalyp jatady. Onyń aldyn alý úshin QR kod júıesi jasaldy. Onyń ishinde taksı, elektrondy SIM-karta, qonaq úı brondaý, negizgi aqparat pen tirkelý qyzmetteri jınaqtaldy, - dedi Erbol Myrzabosynov Úkimet otyrysynda.
Ázirge QR kodtar elimizdiń 4 qalasynda, ıaǵnı Astana, Aqtaý, Túrkistan jáne Shymkent qalasynda ǵana ornalastyrylǵan.
- Qazir QR kodty áýejaılarda ornalastyrý úshin qosymsha qarajat qajet bolyp otyr. Osyǵan oraı tájirıbeni keń taratý úshin tıisti ákimdikter men Kólik mınıstrliginiń qoldaýy qajet. QR kodty barlyq áýejaıǵa, vokzaldar men shekara ótkelderine ornalastyrý kerek, - deıdi ol.
Buǵan deıin Týrızm jáne sport mınıstri elimizge kelgen sheteldik týrıster sanaǵyn júrgizýge qatysty túsinik bergen edi.
Aıta ketsek, byltyr elimizge ártúrli maqsatta 15,3 mln sheteldik qonaq kelgen.
Sondaı-aq Úkimet otyrysynda elimizde qonaq úı júıesine reforma júrgiziletini aıtyldy.
Odan bólek, elimizde sharýalarǵa agrotýrızmmen aınalysýǵa ruqsat berilmek.