Astanada sheteldikterge zańsyz JSN berý shemasy anyqtaldy
ASTANA. KAZINFORM — QMA Astana qalasy boıynsha departamenti memlekettik organdardyń aqparattyq júıeleri men sybaılas jemqorlyq tetikterin paıdalaný arqyly shetel azamattaryna jeke sáıkestendirý nómirin (JSN) zańsyz rásimdeý shemasyn anyqtap, jolyn kesti. Bul týraly QMA-nyń baspasóz qzmeti málim etti.
— Qoldanystaǵy zańnamaǵa sáıkes shetel azamattaryna JSN berý olardyń Qazaqstan aýmaǵynda jeke qatysýy jáne mindetti bıometrııalyq sáıkestendirýden ótýi arqyly ǵana júzege asyrylady, — delingen habarlamada.
Alaıda 2024–2025 jyldary ótinish berýshilerdiń elge kelýinsiz-aq JSN rásimdeýge zańsyz kómektesetin qylmystyq shema uıymdastyrylǵan.
— Shemany júzege asyrý úshin áleýmettik jelidegi arna paıdalanylyp, sol arqyly JSN-dy qashyqtan alýǵa múddeli shetel azamattary izdestirilip, tartylǵan, — dep habarlady QMA—dan.
Qylmystyq áreketke «Azamattarǵa arnalǵan úkimet» memlekettik korporatsııasy» KEAQ-nyń Astana qalasy boıynsha fılıalynyń qyzmetkerleri tartylǵan. Olar HQKO aqparattyq júıesine kórineý jalǵan málimetter engizip, JSN alýǵa qatysty jalǵan ótinimder rásimdegen.
Zańsyz syıaqy deldaldar arqyly bank aýdarymdary túrinde berilip, keıin shemaǵa qatysýshylar arasynda bólingen.
Qylmystyq is sotqa joldandy.
QR QPK-niń 201-babyna sáıkes ózge aqparat jarııa etýge jatpaıdy.
Buǵan deıin QMA Qyzylordada qarjy pıramıdasyn basqarǵan azamat 5 jylǵa sottalǵanyn málimdedi.
