Qazaqstanǵa kelgen týrıster zańsyz taksısterge aldanbaýy úshin QR-kodtar ornatylady
ASTANA. KAZINFORM – Týrızm jáne sport mınıstrligi elge keletin týrıster úshin túngi ekspress-marshrýttardy iske qosýdy usyndy jáne senimdi taksı, qonaqúıler tizimi jazylǵan QR-kod júıesi engizilmek. Bul týraly mınıstr Erbol Myrzabosynov Úkimettiń búgingi otyrysynda baıandady.
− Zańsyz taksı qyzmetteri – keń taralǵan problema. Bul úshin halyqaralyq áýejaılarda QR-kod júıesi engizilip, senimdi taksı, qonaqúıler, elektrondy sım-kartalar men týrıstik nysandar týraly aqparat kórsetiledi. Ákimdikter bul jumysty turaqty túrde qadaǵalap, túsindirý jumystaryn júrgizip otyrýy kerek. Qajet bolsa, zań buzýshylarǵa qatysty jaýapkershilikti kúsheıtý múmkindigi de qarastyrylýy qajet, − dedi E.Myrzabosynov.
Sondaı-aq, iri halyqaralyq qalalardaǵy sekildi túngi ýaqytta áýejaıdan qala ortalyǵyna avtobýs qatynasy joq. Bul máseleni sheshý úshin túngi ekspress-marshrýttardy iske qosý usynylyp otyr.
− Avtotýrısterge kórsetiletin qyzmet mádenıeti de erekshe mańyzǵa ıe. Polıtsııa tarapynan kórsetilgen kómek el týraly jaǵymdy pikir qaldyryp jatyr. Mysaly, Jambyl oblysynda joǵalǵan qujattardy taýyp bergen jaǵdaı bar. Batys Qazaqstan men Ulytaý oblystarynda da týrısterge kómek kórsetildi. Sonymen qatar negizsiz toqtatý men dóreki qarym-qatynas faktileri de kezdesedi. Bundaı jaǵdaılar eldiń bedeline keri áser etedi. Avtotýrısterge arnalǵan jadynama shet tilderine aýdarylyp, ótkizý beketteri men vokzaldarda taratylady, − deıdi mınıstr.
Bul rette halyqtyń da týrıstermen sypaıy jáne túsinistikpen qarym-qatynas jasaýy mańyzdy. Túrkııa úlgisimen qarapaıym erejeler jınaǵyn jasap, turǵyndarǵa taratý usynyldy. Onda týrısterge qurmet kórsetý, ádiletti baǵa, qaýipsizdik jáne sypaıylyq máseleleri jazylady.
Aıta keteıik, ótken jyly elimizge 15,3 mıllıon týrıst shetelden kelgen. Sondaı-aq, 10 mıllıonnan astam ishki týrıst el ishinde saıahattaǵan.
Qazaqstanǵa 87 eldiń azamaty vızasyz kele alady, taǵy 107 eldiń azamaty elektrondy vızamen kire alady.
Sondaı-aq, Qazaqstanǵa kelgen týrısterge tegin SIM-karta berý usynyldy.