Qazaqstanǵa kelgen týrıster orta eseppen qansha kún bolady

ASTANA. KAZINFORM — Ulttyq statıstıka bıýrosy 2025 jyldyń qańtar jáne shilde aılarynda 24 myń sheteldik kelýshiler arasynda iriktemeli zertteý júrgizdi. Olardyń 73,1% Qazaqstanǵa jeke maqsatpen kelse, qalǵan 26,9% jumyspen kelgen. 

Kelgen týrısterdiń jartysynan astamy 25 pen 44 jas aralyǵynda.

Eń kóp týrıst Astana, Almaty qalalaryna jáne Mańǵystaý oblysyna barǵan. Týrısterdiń 32,5% kýrorttyq aımaqtardy aralaǵan. Olardyń ishinde eń kóp baratyn oryndar — Almaty taý klasteri men Mańǵystaý óńiri.

Qazaqstanǵa kelý (jáne elden shyǵý) úshin týrıster negizinen temirjol kóligin (33,3%), áýe kóligin (26,6%) jáne halyqaralyq avtobýs marshrýttaryn (22,7%) paıdalanǵan.

Turý oryndary boıynsha týrısterdiń basym bóligi (48,3%) týystarynyń nemese tanystarynyń úıinde aqysyz toqtaǵan, 25,7% qonaqúılerde, al 21,4% jalǵa alynǵan páterler men úılerde turǵan.

Kelgen adamdar orta eseppen 4 kún qonǵan.

Kelgen týrısterdiń jalpy shyǵyny 4,6 mlrd teńge. Negizgi shyǵyndar — elge kelý jáne ketý kezindegi kólik shyǵyndary (2,3 mlrd teńge), ornalastyrý oryndaryndaǵy turý aqysy (554,5 mln teńge) jáne qoǵamdyq tamaqtaný oryndaryndaǵy (meıramhanalar men kafeler) shyǵyndar (439 mln teńge).

Zertteý týrıster Qazaqstannan ketip bara jatqan sátte áýejaılarda, temirjol vokzaldarynda, avtobeketterde jáne avtomobıl ótkizý beketterinde júrgizilgen.

Zertteýge 71 elden kelgen týrıst qatysty, olardyń ishinde eń kóbi Reseı, Ózbekstan jáne Qyrǵyzstan elderinen. 

Aıta ketelik elge 7,5 mıllıon sheteldik saıahattap kelgen.