Qazaqstanǵa kelgen Shrı-Lanka azamaty ustaldy
ASTANA. QazAqparat - Almaty shekaralyq baqylaý jasaǵynyń shekarashylary bóten qujatpen Qazaqstanǵa kirgisi kelgen Shrı-Lanka azamatyn ustady, dep habarlaıdy QazAqparat QR UQK Shekara qyzmetiniń baspasóz qyzmetine silteme jasap.
«Almaty shekaralyq baqylaý jasaǵynyń shekarashylary Almaty halyqaralyq áýejaıynda ózge adamnyń sheteldik pasportyn kórsetken Shrı-Lanka azamatyn ustady. Alǵashynda qujattaǵy sýret esh kúdik týǵyzbaǵan, sheteldik qonaq ta ózin senimdi ustaǵan. Biraq tájirıbeli shekarashylardyń qyraǵy kózinen syr jasyrý múmkin emes, 5-7 mınýttan soń «shaqyrylmaǵan qonaq» óz aıybyn moıyndady», - delingen Shekara qyzmetiniń baspasóz qyzmeti jibergen habarlamada.
Sheteldik azamat jalǵan qujatty óz elinde 3500 AQSh dollaryna jasatqanyn málimdedi. Onyń óz qujatynyń bolmaýy jáne Qazaqstanǵa degen «qulshynysy» sebebin Shrı-Lankanyń arnaıy organdary anyqtaıtyn bolady.
Shekara qyzmetiniń habarlaýynsha, jalǵan qujatpen ustalǵan azamatty Almaty-Dýbaı reısimen deportatsııalaý josparlanyp otyr.
