Qazaqstanǵa kelgen sheteldik týrıster sany 37%-ǵa artty

Bıylǵy qańtardan qyrkúıek aıyna deıin elimizge 834,9 myń sheteldik týrıst saıahattaǵan. Bul – byltyrǵy kórsetkishke qaraǵanda 225 myń adamǵa nemese 37%-ǵa kóp, dep habarlaıdy Kazinform Týrızm jáne sport mınıstrligine silteme jasap.

Byltyr bul aralyqta elimizge 609,8 myń sheteldik kelgen edi.

«Keıingi jyldary sheteldik týrısterdiń Qazaqstanǵa qyzyǵýshylyǵy arta bastaǵany baıqalady. Máselen, bıyl elimizge 800 myńnan astam sheteldik kelgen. Jyl sońyna deıin bul kórsetkish 1,4 mıllıonǵa jetýi múmkin degen boljam bar. Buǵan elimizdiń kórseń kóziń toıatyn tabıǵı sulýlyǵy, mádenı baı muramyz jáne qonaqjaılyǵymyz dálel bola alady. Biz elimizdi týrıster úshin odan da tartymdy ári qyzyqty etý jáne baıtaq jerimizge tabany tıgen árbir saıahatshyǵa umytylmas áser qaldyrý úshin tyrysamyz», — dedi QR TSM Týrızm ındýstrııasy komıteti tóraǵasynyń mindetin atqarýshy Nurtas Káripbaev.

9 aıdyń qorytyndysy boıynsha, 2023 jyly ornalastyrý oryndary qyzmet kórsetken ishki týrıster sany 2022 jyldyń sáıkes kezeńimen salystyrǵanda 553 myńǵa artyp, 5,4 mln adamǵa jetti. 

Bul kórsetkish pandemııaǵa deıingi kezeńmen salystyrǵanda 1,3 mln adamǵa kóp (2019 jyldyń 9 aıynda 4,1 mln adam).