Qazaqstanǵa kelgen sheteldik týrısterdiń sany rekordtyq kórsetkishke jetti
ASTANA. QazAqparat - Qazaqstan halyqaralyq týrızm kartasynda óz ornyn nyǵaıtyp keledi. Osy jyldyń 9 aıynda elimizge kelgen sheteldik týrısterdiń sany 5,8 mıllıon adamdy qurap, rekordtyq kórsetkishke jetti, dep habarlaıdy finprom.kz saıty.
Málim etilgendeı, sońǵy 5 jylda elge saıahattap kelgen týrıster sany 5 mıllıon adamnan aspaǵan. Ótken jyldyń qańtar-qyrkúıegimen salystyrǵanda Qazaqstanǵa kelýshiler sany bıyl 18,1% ósken.
Zertteýge sáıkes, qazaqstandyqtardyń da otandyq týrızmge degen qyzyǵýshylyǵy artyp keledi. Azamattardyń kóp bóligi shetelde emes, elimiz ishindegi demalysty tańdaýda. Bıylǵy 9 aıdyń qorytyndysy boıynsha ishki týrıster sany 4,4 mıllıon adamǵa jetken, bul ótken jylǵy kórsetkishtermen salystyrǵanda 25% kóp. Syrtqy týrızmmen qatar ishki týrızm de 2010 jyldan bergi kórsetkishtiń eń joǵary deńgeıine jetti.
Budan bólek, bıyl qańtar-qyrkúıek aralyǵynda túrli deńgeıdegi qonaqúılerde 3,9 mıllıon bólme jalǵa alyndy, bul ótken jyldyń osy kezeńimen salystyrǵandan 23,7% joǵary.
Nómirlerdiń eń kóp bóligi qymbat jáne bes «juldyzdy» qonaqúılerde berilgen. Shuǵyl derekter boıynsha, bıyl bes «juldyzdy» qonaúılerde nómirlerdiń 50,5% týrıstermen tolyqqan. Bul kórsetkish ótken jyly 40,5%-dy qurady.
