Qazaqstanǵa kelgen sheteldik týrıster kúnine 100-200 dollar jumsaıdy - sarapshy
Spıker Almatyda BAQ ókilderimen kezdesý barysynda memleket týrıstik salany qoldap, túrli elderden qonaqtardy barynsha kóp tartý úshin ınfraqurylymdy damytý kerektigin aıtty.
«Men syrttan keletin týrıst týraly aıtqym keledi. Túsinikti bolý úshin mysal keltireıin. Qazaqstanǵa kelgen bir týrıst kúnine orta eseppen, jatyn ornyn qosqanda 100-200 dollar jumsaıdy. ıAǵnı, bul tórt juldyzdy qonaqúıde turatyn qarapaıym týrıst. Ádette ortasha uzaqtyǵy 3-4 túnnen bastalady. Elestetip kórińizshi, bir týrıst óz aqshasyn Qazaqstanǵa ákelip, osynda jumsady, sonymen qatar jumys oryndaryn ashty», - dedi ol.
Onyń aıtýynsha, dúnıejúzilik týrıstik uıymnyń resmı statıstıkasy boıynsha bir týrıst 11 jumys ornyn ashady eken.
«Kóptegen memleketterdiń syrtqy jáne ishki týrızmdi damytýǵa ınvestıtsııa salýy beker emes. Bul ár el úshin óte mańyzdy. Sondyqtan iri elder jarnamaǵa mıllıondaǵan dollar jumsaıdy. Osyǵan baılanysty Qazaqstan, ókinishke oraı, kóp qarjy jumsamaıdy. Iá, keıbir sharalardy ákimdikter júrgizedi, biraq munyń ózi jetkiliksiz. Sondyqtan adamdar biz týraly bilip, qyzyǵýshylyq tanytýy úshin kóp jumys isteý kerek», - dedi ol.
Ásem Qozbaǵarova ımıdjdi nasıhattaý úshin sheteldik blogerlerdi kóbirek shaqyrý kerek dep esepteıdi.
«Mamyr aıynyń basynda bizge Saýd Arabııasynan birneshe bloger kelgeni esimde. Olar ketkenen keıin bizge sol elden týrıster kóptep kele bastady. Blogerlerge rahmet. Men ózim sol kezde Parsy shyǵanaǵynda boldym, seriktestermen kezdestim, olar maǵan bizge kelgen blogerlerdiń áleýmettik jelilerdegi paraqshalaryn kórsetti «, - dep eske alady ol.
Sonymen qatar, ol karantındik shekteý sharalary joıylǵannan keıin Qazaqstanǵa týrıster aǵyny artqanyn atap ótti.
«Baıqasańyz, qazir Almatyda BAÁ, Úndistan, Parsy shyǵanaǵy elderinen kelgen týrıster júredi. Qazaqstanǵa negizinen ortasha tabysy bar týrıster keledi. Ony ózimiz de baqylap, kórip júrmiz. Olardy negizinen Qazaqstannyń tabıǵaty men aýa raıy qyzyqtyrady. Desekte, paıyzǵa shaqqanda týrıster sany óte az. Negizinen týrıster Ázirbaıjan, Armenııa, Grýzııa, Túrkııaǵa kóbirek barady. Biz bul elderden artyq bolmasaq, kem túspeımiz. Biz sheteldiń qonaqtarǵa básekelesterimizge qaraǵanda jaqsy qyzmet usyna alamyz», – deıdi Ásem Qozbaǵarova.
Spıkerdiń sózinshe, sheteldik týrıster kóbinese Almaty, Nur-Sultan, Býrabaı, Qazaqstannyń ońtústigine jáne Aqtaý qalasyna barady.
«Olar basqa jerlerge barmaıdy. Tipti Almatyǵa da sheteldik týrıster kele bermeıdi. Salystyrý úshin 2019 jyldy alaıyq. Ázirbaıjanǵa arab elderi men Parsy shyǵanaǵynan 200 myńǵa jýyq týrıst keldi.Al Qazaqstanǵa arab elderinen kelgen týrısterdiń sany 25 myńnan asqan joq. ıAǵnı, aıyrmashylyq orasan zor», - dedi ol.
