Qazaqstanǵa kelgen reseılik ánshi V.Tokarev óz eliniń radıo dıdjeılerine kóńili tolmaıtynyn aıtty
ALMATY. 16 aqpan. QazAqparat - Almatyda ótken «Shanson juldyzdary Qazaqstanda» І Halyqaralyq festıvaline qatysqan keńestik, amerıkalyq jáne reseılik ánshi, sazger Vıllı Tokarev óz eliniń radıo dıdjeıleri qoıatyn mýzykaǵa kóńili tolmaıtynyn aıtyp, olardy synǵa aldy.
«Jaqsy avtorlar men mýzyka barlyq elde jetkilikti. Biraq oǵan shópti de shóńgeni aralastyrýǵa bolmaıdy. Onyń jaqsy-jamanyn mýzykanyń ártúrli qaltarys-qatparlaryn jilikteı alatyn kásibı maman ǵana aıyra alady», - deıdi V.Tokarev.
Ánshiniń pikirinshe, radıodaǵy mamandardyń kópshiligi mýzykadan saýaty az adamdar. Bári aralastyrylyp, talǵamsyz berilip jatqan soń tyńdaýshylar mezi bolatyn jaǵdaı qalyptasyp otyr. «Mýzykalyq týyndynyń tyńdaýshysy bir, onyń ulttyq, memlekettik shekarasy bolmaıdy», - deıdi ol.
«Áskerde teńizshi bolyp azamattyq boryshymdy ótep júrgende radıo qabyldaǵyshtan Túrkııa men Eýropa elderiniń radıo tolqyndaryn qabyldap, tyńdaıtynbyz. Olar úlken talǵammen, keremet radıo habarlar jasaıtyn. Óıtkeni olardy bilimi bar kásibı mamandar ázirlep shyǵarady. Qazir bizde «Mádenıet» arnasynan basqa eshbir stantsııada mundaı habarlar joq. Ony ashyq aıtýǵa meniń quqyqym bar. Óıtkeni keńestik dáýirdiń de, ózge shet elderdiń de ónerdi nasıhattaýdaǵy úlgi bolar jaqsy dúnıelerin kóp kórdim», - dep túıdi ol.
