Qazaqstanǵa kelgen oralmandardyń 54,1 paıyzy eńbekke qabiletti jasta - T. Dúısenova
ASTANA. Qazannyń 29-y. QazAqparat /Qanat Mámetqazyuly/ - Qazaqstanǵa kelgen oralmandardyń 54,1 paıyzy eńbekke qabiletti jastaǵylar.
Bul týraly búgin QR Parlamenti Májilisinde kóshi-qon salasyndaǵy zańnamalardyń halyqaralyq tájirıbesine arnalǵan semınar barysynda eńbek jáne halyqty áleýmettik qorǵaý mınıstrliginiń Jaýapty hatshysy Tamara Dúısenova málim etti, dep habarlaıdy QazAqparat.
«Táýelsizdik alǵaly beri Qazaqstan álemdik kóshi-qon úderisterine belsendi atsalysyp keledi. Áleýmettik-ekonomıkalyq turaqtylyq, ornyqty ekonomıkalyq ósý jáne ómir súrý deńgeıiniń artýy, ultaralyq qaqtyǵystardyń joqtyǵy, sondaı-aq ońtaıly geosaıası jaǵdaıy Qazaqstandy mıgranttar aǵylǵan ortalyqtardyń birine aınaldyryp otyr. Jalpy kóshi-qon máselesi saıası-ekonomıkalyq jáne áleýmettik salalardy qamtıtyn kópqyrly úderis. Sebebi toptasyp bir aımaqtan ekinshi aımaqqa nemese bir elden basqa bir elge qonys aýdarýdyń qabyldaıtyn tarapqa jaǵymdy da jaǵymsyz da áser tıgizýi múmkin. Sondyqtan árbir memleket óziniń ulttyq qundylyqtaryn eskere otyryp, kóshi-qon saıasatyn júrgizedi», dedi T. Dúısenova.
Jaýapty hatshynyń aıtýynsha, 1993 jyldan bastap Qazaqstanda etnıkalyq mıgranttardyń elge kelýin retteý sharalary qolǵa alynyp, osyǵan baılanysty memleketten arnaıy kvota belgilenetin bolǵan. Sońǵy jyldary oralmandarǵa arnalǵan osy kvota jylyna 15 myń otbasyna beriletin bolsa, aǵymdaǵy jyldan bastap bunyń sany 27 myń otbasyna deıin jetip otyr. «Demografııalyq qatynas boıynsha elimizge kelgen oralmandardyń jartysynan astamy, ıaǵnı 54,1 paıyzy eńbekke qabiletti jastaǵylar. Al 18 jasqa deıingi balalar kórsetkishi 41,2 paıyzdy qurasa, zeınetkerler jalpy oralmandardyń 5 paıyzyna jýyq», dedi T. Dúısenova. Onyń aıtýynsha, bul kórsetkishter kútilgendeı elimizdiń demografııalyq ahýalyn ońtaılandyra túsetin bolady.
