Qazaqstanǵa keletin týrıster sany artty
ASTANA. KAZINFORM — Qazaqstanǵa keletin sheteldik qonaqtar sany artyp keledi. Resmı derek boıynsha, bıyl alǵashqy jartyjyldyqta elimizge 7 mıllıon sheteldik týrıst kelgen.
Týrızmnen túsetin tabys ta ósip otyr. Máselen, Almaty oblysynda segiz aıda týrızm salasynan bıýdjetke 3,9 mıllıard teńge túsken. Bul byltyrǵydan 39 paıyzǵa kóp. Al alǵashqy jartyjyldyqta óńirdegi qonaqúıler men demalys oryndary 264 myńǵa jýyq týrıst qabyldaǵan.
Qazir týrısterdi tabıǵat pen tarıhı oryndarmen qatar, iri mádenı jáne sporttyq sharalar da qyzyqtyrady. Byltyr Almatydaǵy Djennıfer Lopes kontsertine 35 elden 7 myńǵa jýyq sheteldik kelgen. Olardyń qaladaǵy týrıstik shyǵyny 5 mıllıard teńgeden asqan.
Bul úrdis bıyl da jalǵasty. Qazaqstanda Enrique Iglesias kontserti, Cirque du Soleil gastrolderi men halyqaralyq festıvalder ótti. Al Astanadaǵy SOLANA FEST festıvaline 12 myńnan astam bıletti sheteldikter satyp alǵan.
Biraq mundaı týrıstik aǵyndy Astana men Almatydan ózge óńirlerge de baǵyttaı alamyz ba? Bul týraly Týrızm ındýstrııasy komıtetiniń resmı ókili Jaınagúl Qappasova Jibek Joly telearnasynyń «Búgin.LIVE» baǵdarlamasynda jaýap beredi.
— Oqıǵalyq týrızm — sheteldik jáne ishki týrısterdi tartatyn mańyzdy baǵyttardyń biri. 2026 jyldyń basynda mınıstrlik tarapynan halyqaralyq ulttyq kúntizbe bekitildi. Oǵan elimizdiń barlyq óńirin qamtıtyn 55 is-shara engizildi. Bul sharalar tek Astana men Almatyda emes, óńirlerde de uıymdastyrylady. Basty maqsat — ár óńirge ishki týrısterdi tartyp, olardyń tabıǵaty men tarıhı-mádenı oryndaryn tanytý, — dedi Jaınagúl Qappasova.
Mamannyń aıtýynsha, Sheteldik tanymal ánshilerdiń kontsertterine keletin týrısterdiń sany artyp keledi. Kelesi jylǵa da mundaı is-sharalar kóp josparlanyp otyr. 2027 jyldyń jańa kúntizbesi kelesi jyldyń basynda belgili bolady.
— Halyqaralyq is-sharalar men kontsertterge kelgen týrıster, ádette, elde 2-3 kún bolady. Olar qonaqúılerge ornalasyp, qalany jáne týrıstik nysandardy aralaıdy. Qazirdiń ózinde 2027 jylǵa deıin elimizde 25-ke jýyq qonaqúı salý josparlanyp otyr. Sheteldik týrıst elge bir ret kelip qana qoımaı, qaıta oralýy úshin eń aldymen sapaly servıs qajet. Sondyqtan halyqaralyq qonaqúı jelilerin tartýǵa jáne osy salaǵa ınvestıtsııa ákelýge basymdyq berilip otyr, — dedi ol.
Sheteldik týrısterge elimizdiń óńirlerin aralatatyn týroperatorlar qyzmet kórsetedi. Olardyń qyzmeti mınıstrlik tarapynan tekserilip, ruqsat beriledi. Týrısterge sapaly qyzmet kórsetý úshin gıdterdiń biliktiligin arttyrýǵa da kóńil bólinip otyr.
— Gıd qyzmetiniń sapasy da mańyzdy. Bul baǵytta Túrkistan oblysynda Týrızm jáne meımandostyq ýnıversıteti jumys isteıdi. Onda kásibı týrızm mamandary daıarlanyp jatyr. Saladaǵy máseleler men syn-eskertýler de nazardan tys qalmaıdy. Týrıster ásirese jazǵy maýsymda tazalyq máselesine qatysty shaǵymdaryn jıi aıtady. Bul baǵytta jergilikti atqarýshy organdar tıisti jumystar júrgizip jatyr, — dedi ol.
Jaınagúl Qappasovanyń aıtýynsha, qazir «Qazaqstan.travel» ulttyq platformasy ázirlenip jatyr. Onda segiz tilde elimizdiń ár óńiri, týrıstik nysandar men josparlanǵan is-sharalar týraly aqparat beriledi.
— Gıdter men týroperatorlar týraly málimet te osy platformadan qoljetimdi bolady. Týrıst úshin qajetti aqparattyń barlyǵy bir jerge jınaqtalady. Platforma kelesi jyly iske qosylady. Kásipkerler óz qyzmetterin sol jerge ornalastyra alady, al týrıster ózine qajetti qyzmet pen baǵytty ońaı tabady, — dedi maman.
Almaty oblysy — týrıster eń kóp baratyn negizgi baǵyttardyń biri. Onyń tabıǵaty men tarıhı-mádenı oryndary týrıster úshin tartymdy. Sonymen qatar basqa óńirlerdiń de týrısterge qolaıly jaǵdaı jasaýyna basymdyq berilip otyr. Mysaly, Qyzylorda oblysynda qonaqúıler salý jáne týroperatorlarmen jumys isteý baǵytynda jobalar júzege asyrylýda. Sondaı-aq Baıqońyr ǵarysh aılaǵyn tamashalaýǵa arnalǵan arnaıy týrıstik marshrýttar ázirlenip jatyr eken.
Aıta keteıik, jaqynda Abaı oblysyndaǵy týrızmniń áleýeti men túıtkilderi jaıynda jazǵan edik.
