Qazaqstanǵa keletin mıgranttar sany azaıar emes - depýtat
NUR-SULTAN. QazAqparat - Shet memleketterden kelgen arzan jumys kúshiniń Qazaqstannyń eńbek naryǵyna tıgizip otyrǵan teris yqpalyn jan-jaqty zerttep qajet. Bul týraly Parlament Májilisinde kóshi-qon protsesterin retteý máseleleri boıynsha ózgerister engizý týraly zań jobasy tanystyrylymynda depýtat Káribaı Musyrman aıtty, dep habarlaıdy QazAqparat tilshisi.
«Qazaqstanǵa jyl saıyn jaqyn jáne alys shet elderden aǵylyp keletin eńbekshi mıgranttar sany azaıar emes. 2018 jyly ishki ister organdarynda jumysqa ornalasý úshin 461,5 myń adam tirkelgen. Buǵan qosa jeke saparmen kelgen 1 mıllıon 277 myńdaı adamnyń jáne týrıst retinde tirkelgen 96,5 myńdaı adamnyń eleýli bir bóligi elimizde zańsyz jumys istegen eńbekshi mıgranttar ekendigi anyq. Al elimizdegi jumyssyzdyq deńgeıi, Statıstıka komıtetiniń málimetine súıensek, keıingi úsh jylda esh ózgermeı, 4,9 paıyzdy qurap, ótken jyly jumyssyzdar sany 443 myńnan asqan. Demek, shet memleketterden kelgen arzan jumys kúshiniń Qazaqstannyń eńbek naryǵyna tıgizip otyrǵan teris yqpalyn jan-jaqty zerttep, zerdelep, tıisti sheshimder qabyldaý qajet dep oılaımyn», - dedi depýtat.
Osy oraıda, Úkimet artyq jumys kúshi bar Almaty, Jambyl, Qyzylorda, Mańǵystaý jáne Túrkistan oblystarynyń turǵyndaryn jumys kúshi jetispeıtin Qostanaı, Pavlodar, Soltústik Qazaqstan jáne Shyǵys Qazaqstan oblystaryna erikti túrde qonys aýdarýdy qolǵa alyp otyrǵandyǵy málim.
«Bul jumysty barynsha utymdy uıymdastyrý qajettigi de sózsiz. Sonymen qatar, shet elderde turatyn birneshe mıllıon etnıkalyq qazaqtar atamekenderi - Qazaqstanǵa kóship kelýdi armandaıtyndyǵy belgili. Alystaǵy aǵaıyndardyń ózderiniń tarıhı Otanyna oralý jolyndaǵy birtalaı bógesinder alynǵanymen, uly kóshtiń qarqynyn tejep turǵan kedergiler tolyq joıylǵan joq. Mine, osyndaı ishki jáne syrtqy kóshi-qon protsesteriniń zańdyq turǵydan retteýdi qajet etetin kókeıkesti máseleleri az emes», - Káribaı Musyrman.
