Qazaqstanǵa qaıta kelgenime qýanyshtymyn - kanadalyq tennısshi
ASTANA. QazAqparat - Qazaqstanǵa qaıta kelgenime qýanyshtymyn. Astana Open ATP 500 týrnıriniń 8-raketkasy, kanadalyq Felıks Oje-Alıassım osylaı deıdi, dep habarlaıdy QazAqparat tilshisi.
- Felıks, Qazaq eline qosh keldiń! Astana qalaı qarsy aldy?
- Óte jaqsy. Munda meni jáne komandamdy adamdar jyly qabyldady. Olardyń bári de qaıyrymdy, qonaqjaı eken.
- 2018 jyly Almatyda chellendjer týrnırinde oınaǵanyń esińde me?
- Iá, jadymda, onda men 18-de ǵana edim, umytpasam, alǵashqy aınalymda utylyp qaldym, tek qarsylasym esimde qalmapty.
- Serbııalyq Nıkola Mıloevıchke 4:6, 6:1, 5:7 esebimen ese jiberdiń ǵoı.
- Ok, endi umytpaıtyn boldym.
- Sen bıyl túrli jarystarda jaqsy tabystarǵa qol jetkizdiń. Aýstralııa ashyq chempıonaty, Madrıd, Rım, Tsıntsınnatı, Monreal týrnırleriniń shırek fınalynda oınadyń. Marselde (ATP 250) fınalǵa shyqtyń. Al Rotterdamda (ATP 500) chempıon atandyń. Endi Astanadan ne kútesiń?
- Astana Open ATP 500 jarysynyń quramy óte kúshti. Men munda barynsha sátti óner kórsetýge tyrysamyn. Myqty oıynshylar keldi, qalǵanyn oıyn kórsetedi.
Eske sala keteıik, budan buryn Astanada Aleksandr Nedovesovtiń álemniń 69-raketkasyn utqanyn jazǵan bolatynbyz.
Sondaı-aq tennısshi Tımofeı Skatov Lıssabon týrnıriniń fınalyna óte almady.
Taǵy bir qazaqstandyq Dmıtrıı Popko Býenos Aıres 2 (Argentına) chellendjer jarysynyń fınalynan tys qaldy.
Ol jartylaı fınalda jergilikti tennısshi Kamılo Ýgo Karabellıge jol berdi - 2:6, 1:6.
Foto: ktf.kz
