Qazaqstanǵa qaıta kelgen belgııalyq Jánibek Jumaǵulov Astanadaǵy balalar úıine bardy
ASTANA. KAZINFORM – Belgııalyq otbasy asyrap alǵan qazaqstandyq Jánibek Jumaǵulov (Djanı) Qazaqstanǵa týǵan anasyn izdep qaıta keldi.
«Meniń ómirim Qazaqstannyń Arqalyq qalasyndaǵy balalar úıinen bastaldy. Sońǵy aılarda men buryn balalar úıinde jumys istegen keıbir tárbıeshimen tanysýǵa múmkindik aldym. Osy merekede alǵysymdy bildirý úshin, Astanadaǵy @kindervillage-degi balalardy qýantyp, kóptegen syılyq, oıynshyqpen barýǵa maǵan ruqsat etildi», - dep jazdy Jánibek Instagram-daǵy paraqshasynda.
Sondaı-aq Qazaqstanǵa týǵan anasyn izdep kelgen otandasymyz Alǵys aıtý kúnine oraı balalarǵa syılyq jasap, qýantqysy kelgenin tilge tıek etti.
«Keıbir balalardyń ata-anasy joq jáne olar kámelet jasqa tolǵanǵa deıin balalar úıinde túrli jastaǵy balalarmen birge turady eken. Olar syılyqtardy alyp, ashyp, kórip jatqanda, júzinderindegi qýanyshty baıqap, ózim de tolqyp kettim. Osy erekshe merekede meniń tilegim – ár balanyń jaqsy, jyly úıde ómir súrgenin qalaımyn. Ár balanyń ádemi ápkesi men aǵasy bolyp, jalǵyzsyramaýyn tileımin. Ár adamnyń aldynda jarqyn bolashaq bolsa eken», - deıdi ol.
Aıta ketsek, osydan eki kún buryn Jánibek Jumaǵulov (Djanı) jeke paraqshasynda Qazaqstanǵa qaıta kelgenin jazǵan.
«Osy aralyqta anamnyń izdegeni týraly suraqtarǵa baılanysty polıtsııaǵa bardym. Olar óte úlken tergeýdi bastady, ol týraly keıinirek aıtamyn», - delingen jelidegi jazbada.
Eske sala keteıik, buǵan deıin Belgııa azamaty asyrap alǵan 22 jastaǵy Jánibek Jumaǵulov (Djanı) Qazaqstanda týǵan anasyn izdep kelgeni týraly jazǵan edik. Otandasymyzdyń anasyn izdestirý jumystarynyń barysymen Jánibek Jumaǵulovtyń Qazaqstandaǵy resmı ókili Qymbat Dosjan aıtyp berdi.
