Qazaqstanǵa qaı jerlerge saıahattaýǵa bolady - KazakhTourism basshysy
ASTANA. QazAqparat - KazakhTourism ulttyq kompanııasynyń basqarma tóraǵasy Rashıd Kúzembaev jazǵy demalysta saıahattaýǵa bolatyn óńirlerdi atady, dep habarlaıdy QazAqparat tilshisi.
«Jazǵy demalysta Ortalyq Qazaqstanda Býrabaıǵa, Qarqaralyǵa, Baıanaýyl, Ulytaýǵa barýǵa bolady. Shyǵysta - Altaıǵa, Zaısan, Marqakól, Rahmanov bulaqtaryna, Almatyda - Sharyn, Kólsaı, Qaıyńdy, Altynemelge, Araldaǵy kemeler ornyna, Kaspııge, Ústirtke, Balqash pen Alakólge barýǵa keńes beremin», - dep jaýap berdi ol QR Úkimetiniń baspasóz ortalyǵynda jýrnalıster saýalyna.
Sondaı-aq, ulttyq kompanııa basshysy kórsetiletin qyzmet sapasyna túsinistikpen qaraýǵa shaqyrdy.
«Ótken jyly Alakólge barýdy uıǵardyq. Ondaǵy servıstiń tómen ekenin aıtqandar boldy. Árıne, qaıda bara jatqanymdy bildim, Taıland pen Túrkııadaǵydaı sapaly qyzmet kórsetýdi kútken joqpyn. Joldyń da jaǵdaıy belgili. Biraq, otbasymmen kólge shomyldym, biz toqtaǵan qonaq úıdiń qojaıyndary óte meıirimdi bolyp shyqty. Ózderi pisirgen baýyrsaq pen tosap, dámdi qaımaqty tatyp kórdik. Baǵasy óte tıimdi boldy (...) Bıyl Ulytaýǵa barýdy josparlap otyrmyz. Ulytaý - tutas Eýrazııanyń ortasynda ornalasqan kıeli jer. Shyńǵys han urpaqtary arasynda jalǵyz Joshy hannyń ǵana kesenesi Ulytaýda saqtalyp qalǵan. Joshy han - Shyńǵys hannyń tuńǵysh uly, qazaq handary áýletiniń bastaýy», - deıdi R. Kúzembaev.
Sonymen birge, R. Kúzembaevtyń aıtýynsha, Qazaqstandaǵy týrıstik áleýeti bar oryndardyń ınfraqurylymy boıynsha jumystar júrgizilýde.
«Batys Eýropa - Batys Qytaı» joly boıyndaǵy 93 qyzmet kórsetý ortalyǵynyń qurylysyna jer telimderi bólinip jatyr. Qyzmet kórsetý standarttary ázirlenip, vızıt-ortalyqtar (kelesi jyly Ulytaý men Tamǵalytasta ashylady) salynýda.
