Qazaqstanǵa qaı elderdiń azamattary jıi keledi
ASTANA. KAZINFORM — QR Іshki ister mınıstriniń orynbasary Igor Lepeha Qazaqstan arqyly basqa elderge ótip jatqan Ózbekstan men Tájikstan azamattaryna qatysty derekterdi aıtty.
«Qazir elimizge Ózbekstannyń 1 mln 73 myń azamaty kirse, 982 myńy ketken. Bul - jyl basynan bergi kórsetkish. Byltyrǵy kórsetkish boıynsha da olar kósh bastady: 5 mln 396 myń azamat kelip, 5 mln 373 myńy ketken. Negizinen, Ózbekstan azamattary bizdiń el arqyly kórshi elderge ótý úshin kiredi», - dedi I. Lepeha Senattaǵy baspasóz máslıhatynda.
Mınıstrdiń orynbasary Tájikstan azamattaryna qatysty osyndaı málimetterdi jarııalady.
«Tájikstan azamattaryna toqtalsaq, jyl basynan beri 218 myń 500 azamat kelip, 213 myń 726 adam ketken. Kóshi-qon zańnamasyn buzǵany úshin Tájikstannyń 710 azamaty jaýapqa tartylyp, 195 adam elden shyǵaryldy», - dedi Igor Lepeha.
Sonymen qatar ol elimizde qaı memleketterdiń azamattary jıi keletinin naqtylady. Olardyń qatarynda Ózbekstan, Qyrǵyzstan, Reseı, Tájikstan jáne Qytaı azamattary bar.
