Qazaqstanǵa qatysty kózqarasty ózgertetin kez keldi - EKPA
ASTANA. QazAqparat - Eýropa Keńesiniń Parlamenttik Assambleıasy Qazaqstanǵa qatysty burynǵy kózqarastan arylýǵa úndep otyr. Sebebi búginde atalǵan memleket Eýrazııa aımaǵynda turaqtylyqtyń tiregine aınaldy.
Qazaqstan Irannyń ıadrolyq baǵdarlamasy men Sırııa daǵdarysy sııaqty jahandyq mańyzy bar máselelerdi sheshýge de óziniń qomaqty úlesin qosyp keledi. EKPA óziniń qararynda osyndaı qorytyndyǵa keldi, dep habarlaıdy QazAqparat tilshisi.
EKPA-nyń vıtse-prezıdenti Aksel Fısherdiń baıandamasy negizinde daıarlanǵan qarar Kopengagende ótken turaqty komıtettiń búgingi otyrysynda qabyldandy. Býndestag depýtaty Fısher óz baıandamasynda Nursultan Nazarbaevtyń reformalary men halyqaralyq bastamalary jaıynda aıta kele, Qazaqstandaǵy ózgeristerdi de jan-jaqty sýretteıdi. Ortalyq Azııada qaýipsizdikti qamtamasyz etý salasyndaǵy jetekshi róline de basa nazar aýdarylady.
Qazaqstan men Eýropalyq komıssııa arasyndaǵy baılanystar da oıdaǵydaı damyp keledi. Osy oraıda qazaqstandyq zańnamany damyǵan elderdiń deńgeıine deıin kótereý jumysyna erekshe kóńil bólinip jatyr. Sondyqtan Assambleıa Eýropa Keńesin qazirgi yntymaqtastyqty odan ary keńeıtýge, zań ústemdigi men adam quqyqtaryn qorǵaýdy kúsheıtýge úndeıdi.
«2016 jyly 1 maýsymda men sol kezdegi syrtqy ister mınıstri Erlan Ydyrysovpen kezdesken edim. Sol kezde ol Eýropa Qazaqstanǵa qaı «kózildirik» arqyly qaraıtynyn, sol «kózildirikti» túzeıtin ýaqyttyń kelgenin jetkizgen. Shynymen de, ol ýaqyt keldi», - deıdi uıymnyń vıtse-prezıdenti, Býndestag depýtaty Fısher.
Onyń oıynsha, Qazaqstan men Eýropa keńesi arasyndaǵy yntymaqtastyqty áli de tereńdete túsý kerek. Odan eki jaq ta utady.
Aıta keteıik, Parlamenttik Assambleıa Eýropa Keńesiniń quramyna kiredi. Qazaqstan Keńeske múshe bolmasa da, onyń qurylymdarymen tyǵyz baılanys jasap keledi. 2004 jyldan beri QR Parlamentiniń delegatsııalary EKPA-nyń otyrystaryna únemi qatysyp otyrady.
